بعد قرار مصطفى كامل بالتحقيق مع شيرين عبدالوهاب.. طارق الشناوي لـ"وشوشة": الفاضي يعمل نقيب
كشف الناقد الفني طارق الشناوي، عن رأيه في قرار نقيب المهن الموسيقية، بإحالة الفنانة شيرين عبد الوهاب للتحقيق، بعد وقوعها في زلة لسان عن الراحل محمد رحيم.
وقال الشناوي في تصريح خاص لـ"وشوشة": "المثل القديم كان بيقول الفاضي يعمل قاضي، ودة مثل قديم كان بيتردد في الشارع المصري.
وأضاف: لكن واضح إن التحديث بتاعه بقى الفاضي يعمل نقيب، يعني لما يكون فيه شخص عنده مشاكل رهيبة ومتعددة زي البطالة بين الموسيقيين، وهو عارف إن نقابة الموسيقيين هي أكتر نقابة فيها أعضاء مقارنة بنقابتي السينمائيين والممثلين، وعندهم مشاكل، لكن أكتر مشكلة كبيرة هي البطالة في نقابة الموسيقيين".
وتابع: "مش قادر يحل المشكلة الرئيسية، وهي إن الناس مش بتشتغل، وده معناه إنهم مش قادرين يفتحوا بيوت ويكفوا التزاماتهم.
وأردف: فالمفروض النقابة تشتغل على خلق مناخ صحي وتنظيم حفلات، لكن هو سايب كل ده ورايح يركز على إن فنانة أخطأت كلنا عارفين إنها غلطت، لكن النقابة عندها أولويات أكبر بكتير".
وتابع الشناوي تعليقه على أزمة شيرين قائلاً: "ذلة لسان ممكن تحصل لأي حد، حتى كبار السياسيين والصحفيين والمفكرين على مر التاريخ، أنا شخصياً وكلنا ممكن نقع في غلطة بالكلام من غير قصد، وده اللي حصل مع شيرين لكن النقيب سايب كل القضايا المهمة وبيركز على حاجة زي دي".
واختتم حديثه قائلاً: "أكرر شيرين غلطت قطعاً لكنها اعتذرت في نفس اللحظة وأدركت خطأها وحاولت تخفف الأمر مع الجمهور لما اتكلمت عن محمد رحيم، اللي ساهم في شهرتها، قالت كلامها بكل حب وصدق كان من المفترض على النقيب تهدئة الأمور بدل تصعيدها، وكمان يركز على القضايا الحقيقية اللي بتواجه أعضاء نقابة الموسيقيين، وعلى رأسها مشكلة البطالة".