عمرو مصطفى لـ"وشوشة": اتحاربت كمطرب واتعرض عليا أخد مليون جنيه مقابل إن أغنية لمستك تتاخد مني وتترمي

حل الملحن عمرو مصطفى، ضيفًا فى ندوة بموقع "وشوشة"، بحضور رئيس التحرير الكاتب الصحفى عمرو صحصاح، ورد على من يشكك في موهبته الغنائية كملحن رغم تقديمه أغنيات كثيرة بصوته.

وقال عمرو مصطفى خلال ندوته في "وشوشة": "بيشككوا في صوتي كملحن عشان أنا الوحيد اللي عندي سر الخلطة اللي التانيين بياكلوا بيها عيش، لو الخلطة دلوقت بقت لعمرو مصطفى التانيين هياكلوا عيش إزاي.

وأضاف: اتحاربت كمطرب لدرجة اتعرض عليا مليون جنيه في أغنية لمستك نسيت الحياة، عشان بس تتاخد وتترمي، ودة حصل سنة 2007.

وأردف: إحنا دلوقت بنهزر ونعمل مزيكا حلوة ومبطلعش أغني لايف في حفلات، أي فنان يحب يقعد في قوقعة يفن لجمهوره، وبعدين خلاص مفيش في دماغي منافسة بقولكم بجهز المدفن بتاعي دلوقت.

وسبق فاجأ الفنان عمرو مصطفى، متابعيه بالإعلان عن تسجيله للقرآن الكريم بصوته، كصدقة جارية له، إلى جانب إعادة تقديمه جميع الأعمال التي قدمها منذ عام 1999 بصوته بعد انتهاء مدة حقوق ملكيتها.

عمرو مصطفى، قال إنه يسجل القرآن الكريم بصوته خلال الوقت الحالي، وذلك ردًا على أحد متابعيه والذي طالبه بتسجيل القرآن بصوته كصدقة جارية، قائلا: بسجله الآن الحمدلله.

وسبق وكشف عمرو مصطفى، عن نيته لإعادة تقديم أعماله بصوته مرة أخرى بعد انتهاء حقوق ملكيتها، حيث كتب عبر حسابه بموقع فيسبوك تفاصيل قراره.

وقال: الأغاني اللي عملتها هترجع تاني بصوتي بعد انتهاء مدة حقوقها، فيه أغاني عملتها من سنة 1999، يعني فاضل حوالي عشرين سنة وترجع الحقوق تاني ليا.

وأضاف: ووصيتي لأولادي عدم التجديد لأي شخص، هنبتدي ننزلها من دلوقتي بصوتي، لكن بالكلام متغير وتوزيع جديد تمامًا، الأغاني دي هتفضل موجودة بصوتي طول العمر، وأي نسخة بصوت أي مطرب غناها قبل كده هتتمسح تمامًا بعد انتهاء المدة القانونية لها.

وأردف عمرو مصطفى خلال منشوره: هنفتح المجال للشباب الجديد إنهم يكتبوا على الألحان دي كلمات جديدة، خلال الخمس أو ست سنين الجايين.

واختتم: هكون محضر كل الأغاني اللي عملتها بصوتي مع كتابات شبابية جديدة، ونصيحة للمبدعين أي تصريح لا يزيد عن خمس سنوات.