الموت يُفجع الإعلامية رولا خرسا فى شربات
عبرت الإعلامية رولا خرسا عن حزنها العميق ومواساتها لصديقتها المواطنة المصرية "شربات"، عبر حسابها الشخصي علي الفيسبوك فكتبت:النهاردة ماتت شربات… شربات كانت عشرة عمر، ست كتبت عنها أكتر من مقال بأسماء مختلفة، واحدة تعبتها الدنيا أوى ورغم كدة كانت بتحارب، عندها بنتين كان نفسها يكونوا أحسن بنات، مش عايزة أحكى حاجات خاصة بيها ولا ببناتها بس عايزة أقول إنه رغم مرضها الشديد آخر سنة محدش فينا توقع إنها حتموت، بيفضل الموت قادر انه يصدمنا، من ساعة ما عرفت الخبر وأنا بسال نفسى أسئلة كتيرة جدا، هل الفقر ممكن يكسرنا؟ .
وأضافت رولا فى منشورها: "هل فيه ناس مكتوب عليها تعافر ولا تلاقيش حد يسندها؟، هل العلاقات العائلية مواقف وإلا رابطة دم؟، هو الموت بيجبرنا ناخد موقف؟، يعني لو زعلانين من حد لازم نصالحه جوانا، ربنا قال اذكروا محاسن موتاكم طب لو الي توفاه الله عمل لنا حاجة هل لازم نمسح الذكرى دي؟، هل عذاب قبل الموت فعلا تكفير ذنوب؟، وهل ممكن نحب شخص مليان عيوب؟، وهل ينفع نعرف ان حد غلط فينا بس نفضل نحبه؟، موت شربات طرح مليون سؤال في دماغى، مالهاش علاقة بيها، بل بحاجات كتيرة اوي حصلت او هي حكتها لى، ومش لاقية لهم ردود، أما بالنسبة لشربات ححاول افتكر لها دايما انها كانت مسجلة اسمي مدام رولا حبيبتي، لا شيء يبقى، ولا أحد..بوست معقد وغير مفهوم أنا عارفة، تماما مثل النفس البشرية، غلبها في الدنيا ومعاناتها خلوني اكتب عنها واحاول الاقي لها اكبر قدر من الناس يترحموا عليه، ربما هى تسأل الان ومحتاجة دعانا كلنا، رحم الله جميع موتاكم وموتانا.
