ياسمين عز تفاجئ محبيها الرجال: في طريقي للجواز والست لازم تخفف أحمال عن حتة البسبوسة جوزها

فاجأت الإعلامية ياسمين عز، متابعيها ومعجبيها خاصة الرجال، بزواجها قريبًا، وكشفت عن سر الزواج الناجح من وجهة نظرها، والتي ستطبقها عند دخولها القفص الذهبي.

وردت ياسمين عز، على سؤال متصلة في برنامجها كلام الناس، المذاع عبر شاشة قناة MBC مصر، عن سر نجاح الزواج، قائلة: أنا هقولك بشكل عام لأني في الطريق للجواز، وأنا شايفة من تجربة أهلي، إن الست عمود البيت والست بذكائها وحكمتها وعقلها واحتوائها وقدرتها على استيعاب الأمور مع الرجل وتقبل اختلافه.

وأضافت: والموضوع اللي مش محتاج من الست أنها تتخانق مع جوزها بلاش تتخانق، الرجل كائن لا يعبر ولا رغاي، الست تكون صبورة وتدلعه ولو شايفين أن اللي بقوله تفاهة لن تفلحوا مع الرجل، أنك تدلعي الرجل صنعة.

وتابعت: لو فيه واحدة خرساء اتجوزت هتلاقوا أن الشكاوي من اللسان الطويل والرد خلصت، متقوليش أنا طيبة واللي في قلبي على لساني، لأ متقوليش اللي في قلبك قدام جوزك.

كما أوضحت ياسمين عز، أنها لا تقبل أن يدخل زوجها في علاقة مع امرأة أخرى، قائلة: عمري ما قولت لو جوزك في علاقة مع واحدة متزعليش ده محبوب، أنا مقبلش أن جوزي يكون في علاقة مع واحدة، ولكن أفرح لما يكون محبوب.

نصيحة ياسمين عز للسيدات

ووجهت ياسمين عز، نصيحة للسيدات: قائلة: بمناسبة الصيف اللي إحنا فيه، ووقف تخفيف الأحمال، مش ناوية تخففي على الراجل اللي جنبك ده؟ حتة البسبوسة اللي جنبك، قولي له شكلك وشعرك وطولك حلو، دلعي الراجل هو مبتدلعش ومسكين، قولي له أنت راجل بروماكس.

وواصلت: أحمالك هتخف لما تخففي أحمال جوزك، هتعيشي سعادة وهتروح الأحمال وهتحققي الأحلام، أول ما الأحمال بتخف الأحلام بتتحق، وحياتكم هتمشي لـ قدام.

واختتمت: كل واحدة معاها راجلها تخاف عليه وتمسك فيه، لو شاريكي وبيحبك وجوزك تحملي علشان خاطره، مش هتلاقي زيه وهتندمي يوم لا ينفع الندم، دايمًا بيقولوا خدوا النصيحة من امرأة سعيدة، وأنا سعيدة واسمعي كلامي أنا عايزة مصلحتك.