عمرو أديب عن واقعة عمرو دياب: هستيريا التصوير مع المشاهير بالإجبار مش مقبولة
تداول الإعلامي عمرو أديب واقعة صفع الفنان عمرو دياب للشاب الذي حاول التقاط صورة معه في حفل زفاف شهير، مساء أول أمس .
وكانت الواقعة قد أثارت جدلا كبيرا على مواقع التواصل الاجتماعي بعد تداول فيديوهات للواقعة.
وقال عمرو أديب في برنامجه “الحكاية” المذاع على قناة “إم بي سي مصر”: "الشاب اللي اتصفع المفروض إنه جاي علشان عنده شغل مش علشان يتصور وحاول يتصور مع محمد رمضان لكن محمد رمضان ما إداهوش وش، رد فعل عمرو دياب كان كبير وضربه بالقلم حاجة ما حدش يقدر يستوعبها ولا يبررها لكن أنت مش هتتصور مع الهضبة بالعافية".
وتابع: عمرو دياب كان واقف بيغني يعني بيشتغل ومش مركز، صحيح إن رد الفعل غير مقبول انسانيا لكن الهستيريا بتاعة المعجبين اللي بيتصوروا مع المشاهير لم تعد مقبولة وزادت عن حدها، خصوصا إن في أحد الحفلات وفي فيديو سابق رأينا المعجبين يحاولون دخول الحمام وراء عمرو دياب، وهو أمر غريب جدا وغير مقبول ايضا.
وأضاف أديب: فنان واقف بيشتغل وجه واحد حط إيده في وسطه، طب إيه الفكرة ما ده أمر غريب جدا، طب أنا كفنان ليه أبقى مجبر على ده، الموضوع برضو بقى صعب أوي وزاد أوي، وأنا مش بدافع عن طرف معين لكن بعرض الموضوع، بس الشخص المشهور ده بني آدم مينفعش تمسكه من غير استئذان، ليه تحط إيدك على وسطي هو أنا عارف ممكن إيه يحصل بعد كده وإحنا في زحمة؟!.
وتساءل أديب: كلنا شفنا لقطة الضرب لكن محدش شاف قبل كده حصل ايه ؟! محدش عارف الامر تكرر قبل كده ازاي وليه وإيه ملابساته، في خطأين واضحين خطأ الشاب ورد فعل عمرو علشان في ناس بتتعامل على السوشيال ميديا مع الموضوع وكأنه رسالة يعني، لا أنا شفت مشاهير كتير في العالم وشفت القواعد المحطوطة في الاقتراب منهم وده معروف، في الآخر عمرو دياب واقف بيشتغل ومركز في الغناء وواحد جاي يتصور معاه بالإجبار ويحط ايده على وسطه وهنا من حقه يقول مش هتصور، آه رد الفعل عنيف لكن التصوير مش بالإجبار.