نجوى فؤاد لـ"وشوشة": شوفت رقاصة لابسة حتة شيفون بين رجليها.. هو الدين بتاعنا قال كدة؟

انتقدت الفنانة القديرة نجوى فؤاد، أحوال الرقص الشرقي خلال الفترة الحالية، وأكدت أنّ الراقصات الأجانب، يرتدين بدل رقص لا تتناسب مع عاداتنا وتقاليدنا.

نجوى فؤاد قالت في تصريحات خاصة لـ"وشوشة": أنا مش ندمانة على بدل الرقص، لكن لو كنت في وعيي وأنا صغيرة، مكنتش هلبس بدلة رقص ودراعي باين فيها.

وأضافت: لكن دلوقت بشوف حاجات غريبة، الراقصات الأجانب بيعملوا حاجات غريبة، لسة متفرجة على واحدة بترقص والله ما أعرف اسمها، لابسة حتة قماشة شيفون بين رجليها وبس.

وتابعت: اللي بيلبسوه ده ضد ديننا وتقاليد مجتمعنا وعاداتنا وثقافتنا وتربيتنا، محدش يرضى بالكلام الفاضي ده، وسايبين صدرهم وأردافهم وكل حاجة عريانة قدام الناس، مصر زمان كان فيها رقابة على الرقص أكتر من كدة.

تصريحات نجوى فؤاد عن الشعراوي

وكانت نجوى فؤاد قد قالت في تصريحات تلفزيونية: "مرة سألت الشيخ الشعراوي، كنا في طائرة واحدة عائدين من الغردقة، وسألته هو الرقص حلال ولا حرام، قال لي لو حرام أو حلال، مكنش ربنا فتح لك السكة دي، ومكنش نجحك فيها، هو اللي قسم لك كدة، الحساب بقى عنده".

واختتمت: هو قال لي لا أقدر أقول لك حرام أم حلال، لكن ربنا فتح لك الطريق دا عشان تاكلي عيش منه، محرمش ومحللش، ولكن قال لي في حساب عند ربنا بقى، وأنا ماعملتش حاجة عشان أتوب.