"الرقم الصعب".. قصيدة جديدة للشاعر أيمن درويش
طرح الشاعر أيمن درويش قصيدة جديدة بعنوان «الرقم الصعب» وتعد هذة القصيدة من القصائد المكتوبه بالشعر الرومانسي حيث اختلط جمال الصور الشعرية بالكلمات الجديدة والمتفرد للشعر.
أنا كنت وحيد قبلك تعبان
واحد مردوده في وشه بيبان
الدنيا
وقاعد ع الحافه
لا افهم في الشوق ولا في دروسه
ولاعندي مراجع في قاموسه
جاهل في الحب وفي طقوسه
اطرش بيسقف في الزفه
واحد مهووس
بنغم فيروز
والقهوة وبالليل والمطره
صفر الاحاسيس
حتة دبشه
بين العشاق
هوا الشجره
دقيتي الباب قالك اهلًا
قولتيله حنين
قالك طبعا
فتح الأوراق وكتب أصلًا
أنا كنت بلاكي بعيش ازاي
فازاي مريتي على حياتي
كمرور الدفا في ليالي البرد
يعجز بيرم عن تشبيهك
ونجيب محفوظ هيخونه السرد
ازاي ازاي توصف تلجه في مايو
وإزاي تشرح تغريد كروان
وإزاي يعشق عازف نايه
مع انه جماد حبه كانسان
وإزاي توصف تأثير خمره
وإزاي تشرح ريحة تمره
وإزاي حبك جاني مغامره
وآنا قلبي روتيني من الاشواق
مليان حكايات وأسلاك شايكه
وانفاق جواه ياما اتردمت
ومعابر فيه ياما اتقفلت
ومدن جواه ياما انضربت
ومشاعر فيه ياما اتسحلت
وأنا بين كل اليامات ديا
شوفتك بتمدي جذور فيا
وشوفتيني أن أنا ليكي قضيه
مضمونه بحبك مكسبها
حتي ولو كل الناس قالت
وفري تعبك
دا مفيش فايده
وأنا مش هكذب
ولا هتجمل
ولا أقول قبلك كنت مكمل
ولا هنكر فضلك على روحي
وإننا قبلك كنت متبت في حبال دايبه
وجتيني
بسفينه نوحيه
قررتي تردي الروح فيا
عطشان ووهبتيله المايه
قاتل ودفعتيله الديه
وفرضتي حضورك
في حياتي
وصبحتي في مملكتي
السايده
وبقيتي في عمري
الرقم الصعب
وصمام النبض
والنار اللي في غيبتك قايده
واللي أنا ببقاني بوجودها
واللي أنا بتنشق على صوتها
كالصوت الخارج للثوار
من أبوعُبيده
ومن اهم أعماله السابقة، اخر رساله، أعظم غزواتي، انسولين، تعيش الشدة، خدعوك فقالوا، كبرنا ياعم.