هند صبرى: تعاطفت مع أمى بعد انفصالها.. واشتغلت وأنا عندى 14 سنة

قالت الفنانة هند صبري: "كنت بتمنى يكون ليا أخ بعد انفصال أبويا وأمي، وماما في فترة كانت عايزة تتجوز ويكون فيه أخوات تانيين ليا ولكني كنت برفض، وأعتقد بابا أيضا كان عنده نفس الرغبة ولكني كنت مستبدة وبرفض رغبتهم".

وتابعت خلال لقائها ببرنامج "السيرة" المذاع على قناة "دي إم سي": ماما فعلًا على قد صرامتها وقسوتها في أوقات إلا أنها كانت محترمة شخصيتي وعالمي الخاص، وانفصالها عن أبويا كان في فترة المراهقة وقتها أخدت صفها، وتعاطفت معاها وتحولت من بنتها لأمها، والطلاق كان قرار بابا مع أنه ما كانش شديد، ولكنه كان حنين عليا أوي وكان شايف إن صرامة ماما لازم يكون ليها مرادف علشان يعوض".

 

وتابعت: "أحلى حاجة أبويا كان بياخدني المكتبة وأروح أقرأ الكتب، وما كانش شديد خالص، ولسه أب حنين، ولكني بقيت جاهزة للحياة بصرامة ماما معايا، ولكني مش مع الضرب في التربية وأمي ما كانتش بتضربني".

ولفتت: "عمري ما كدبت على أهلي وكان فيه مساحة إني أقول رأيي بوضوح ودون خوف وطول الوقت كان فيها شفافية مطلقة، وطلعت الأولى علي كلية الحقوق وكرمت من رئيس الجمهورية بفضل حبي للقراءة والتعلم، واشتغلت بدري وأنا عندي 14 سنة ولكن ده ما منعنيش من التفوق في الدراسة وطلعت الأولى".