حلا شيحة عن تصريحات والدها: "لا يصح أبداً وأنا بحب زوجى
الأحد 18/يوليو/2021 - 10:56 ص
رضوى فاروق
حالة من الجدل والتصريحات العلنية التي تحمل طابع هجومي، أثيرت بين الفنانة حلا شيحة، ووالدها الفنان التشكيلي أحمد شيحة، بعدما هاجمها الأخير، ذاكرًا أن زواجها وقرارتها الجديدة "محاولة اختطاف لها ولم تكن أبداً كذلك".
وردت "حلا" في تصريح جديد، كتبته عبر حسابها على موقع انستجرام قائلة "الحقيقة مصدومة من الكلام اللي والدي قاله عن زوجي اللي اتجوزته بكامل ارادتي و الحمد لله لقيت معاه كل المعاني الجميلة من احترام و رجولة و شهامة نادرة الايام دي".
واستكملت "انا لم يخطفني احد كما قال والدي و الكلام ده لا يصح ابداً.. انا بحب زوجي و سعيدة بحبه ليا و بنحترم بعض و معز بيحترم رايي و بيقدر مشاعري و بالعكس هو دائما بيهدّيني . و طبعا بيساندني ويشجعني لاني زوجته و حبيبته.. و هو اكبر بكتير من كل الكلام اللي بيتقال عليه و افتراءات مش صحيحة و هو ابعد ما يكون عنها".
وأضافت "لن اسمح لاحد الكلام عنه و لن اسمح بأي تصور خاطئ عنه بأي شكل من الاشكال معز طول عمره له رؤيته الواضحة في الدين و حتي في الفن و هو ليس مع اي جماعة او فئة معينة هو يمثل نفسه و له افكاره وارائه العلمية و الدينية المختلفة الجميلة و ليس لاحد ان يصنفه او يضعه في اي قالب فقط لأن هواه لا يوافق ما يمثله معز".
وأشارت "هو في ايه في بلدنا الايام دي بنحارب و نصارع في بعض و عايشين في قصص وهمية من نسج خيالنا عن بعض ..هو خلاص اي حد يتكلم بلغة الدين لازم يبقي متطرف او اخواني هو مبقاش في مسلمين وسطيين طبيعين هو ليه كل انواع الهجوم ده علي اي حد".
وعاتبت والدها قائلة "انا زعلانة من والدي جداً لانه يعرف معز كويس جدا و قعدوا مع بعض كتير ووالدي يحبه جدا و شاف منه كل خير.. معز زيي اتجوز ١٤ سنة من عمره و كان مستقر في حياته و عنده ثلاث اولاد ربنا يخليهمله جمال ماشاء الله و عمره ما كان بتاع ستات زي ما بيتقال كلام لايليق ابدا و في الاخر زيي لم يكمل جوازه و حدث الطلاق و كلنا معرضين لده طبيعي انه كان بيحاول زي اي راجل محترم انه يلاقي استقرار في حياته في الحلال و متوفقش اكتر من مرة و دي مش حاجة تعيب أي حد، والحمد لله اتقابلنا و تلاقينا لان ظروفنا قريبة جدا و عندي اولاد مثله و اولادنا شبه بعض الحمد لله و استقرينا احنا الاتنين".
وأوضحت "ليه ده يزعل الناس بدل ما ندعي لبعض بالخير بقينا نتصيد لبعض
و نخوض في اعراض بعض هو حصل في مجتمعنا ده احنا جرالنا ايه ،
في الاخر بوجه كلمة لوالدي الحبيب ان لا يصح ابدا كلامك مع كامل احترامي لك و للجميع ..انا الحمد لله سعيدة في حياتي و مع زوج اتشرف انه زوجي و بعتز بيه و احنا اصدقاء قبل ان نكون أزواج".
واختتمت "و كل كلمة اكتبها و قلتها نابعة مني و انا متدينة بطبعي زي اي ست مصرية بتحب دينها وده لا يعيبني. وتديني اللي بدأ من اكتر من ١٥ سنة من المنطقي ان معز مش هو سببه.. مش محتاجة حد يخطفني او يكتب عني او يوجهني.. هذا كلام لا يليق.. دعوا الخلق للخالق و كل واحد يخليه في حاله .. وياريت نسمع من بعض بدل ما نسمع عن بعض.. احسنوا الظن".
وجاء هذا التصريح المذكور لـ"حلا" على خلفية مهاجمتها للفنان تامر حسني، بسبب طرحه للكليب التي هي بطلته، واصفة إياه "مايرضيش ربنا"، متهمة الوسط الفني أنه "مفتون بالشهرة".
