أول تعليق لـ تامر حسنى على هجوم حلا شيحة
الخميس 15/يوليو/2021 - 02:40 م
هايدي عبد الرافع
قرر الفنان تامر حسني، أن يرد على الفنانة حلا شيحة، بعد أن هاجمته وقالت إنه تجاهل طلباتها فى منع طرح لها فيديو كليب أغنيته الجديدة "بحبك" من فيلم "مش أنا" الذي يُعرض حاليًا في دور العرض السينمائية.
وكتب "تامر" عبر صفحته الرسمية على "فيس بوك": "الحقيقه عمري ما بتخيل إني أدخل في نقاش بالشكل دا مع زميل بحترمه و كان في بينا كل خير، للتوضيح بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصياً و نتناقش بيني و بينك ، فا أنا مضطر أرد هنا برضه".
وتابع: " أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي أوعد و أخلف الحقيقه اني إحترمت كلامي معاكي، وعدتك أشيل مشاهد تانيه طلبتيها وشيلتها بالفعل وشكرتيني عليها ولو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف".
وأضاف: "انتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع، وبقيتي تقفلي تليفوناتك و تكنسلي علينا كلنا وبعدين أي فيلم بيبقى ليه خطه مسبقه في الدعايه وانتي عارفاها كويس و وافقتي عليها و ده كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني مثلاً هو دا يُعقل؟".
واختتم تامر حسني، حديثه معاتبًا حلا شيحة، قائلا: "أنا زعلان منك جدًا يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كده وهكتفي بالتوضيح دا و ربنا يهدي الجميع و يكتبلك كل الخير اللهم آمين".
وكانت قد وجهت حلا شيحة حديثها لتامر حسني، قائلة: "أنا اتفاجئت بنزول كليب يجمع فيه مشاهد متفرقة من الفيلم وفي أيام ذى الحجة أيام مباركة وخصوصاً بعد آخر بوست نزلته ووضحت فيه أنا إيه، واتفاجئت أكتر خصوصا بعد وعد تامر حسنى ليا وتأكيده أنه حيحترم رغبتى وبعض الطلبات اللى طلبتها منه بكل احترام وود الصيف اللى فات وأكدلي أنه حيحترم رغبتي".
