أحمد السعدنى يدافع عن عبدالرحمن أبو زهرة بهذا الموقف!
الإثنين 20/يوليو/2020 - 03:03 م
رضوى فاروق
دافع الفنان أحمد السعدني، عن النجم القدير عبدالرحمن أبو زهرة، مستشهداً بموقف في بداية حياته الفنية مع المخرج علي عبدالخالق، الذي قسى عليه بحديثه على حد قوله، مؤكداً أن ذلك كان في مصلحته، في إشارة منه إلى ما تداوله بشأن الفنان عبدالرحمن أبو زهرة من انتقادات.
وكتب "السعدني" عبر حسابه الشخصي على موقع فيسبوك: "اول فيلم اعملوا في حياتي هو فيلم يوم الكرامه اخراج استاذ علي عبدالخالق كنت طالب في المعهد و كان عندي امتحان ٩ الصبح في الهرم و تصوير ٢ الظهر في بورسعيد قلبت الامتحان في ساعه و قلت عشان انجز اخد القطر لبورسعيد".
وتابع: "ركبت القطر ١١ و نمت و انا نايم كنت بحلم ان القطر كل شوية يقف و ناس تنزل و ناس تركب صحيت حسيت اني نمت كتير ازاي كده و الطريق ساعتين تقريباً ببص في الساعه لقيتها ٤ العصر و لقيت الانتاج مكلمني ٣٤ مره و لقيت القطر واقف يحمل قمة الازبهلال مع احساس بالرغبة العارمه لعمل البيبي و من فتحة بقي اللي مخليا الست اللي قاعده جنبي شافت زوري تقريباً قالتلي مالك في ايه قلتلها احنا فين قالتلي في القصاصين".
واستكمل: "ما علينا اني معرفتش احنا فين برضه قلتلها مش احنا رايحين بورسعيد قالتلي اه بس ده قشاش بيقف في كذا محطه احيه احيه اعمل ايه كلمتهم قلتلهم سمعوني ممن المنقي خيار المهم علي ما وصلت و جهزت الساعه كانت ٦ دخلت وشي في الارض و الاستاذ بيشرح المشهد كنت ميت من الجوع اكيد مكلتش من الصبح كان في ايدي سندوتش بضربه في الخباثه علي قدر الامكان و في لحظه و انا بستطعم الجبنه السايحه سمعت الاستاذ بيقول بريك يا جماعه عشان الاستاذ احمد بياكل بصيت علي احمد عز لقيته مبياكلش عرفت ان انا المقصود".
وأضاف: "اللقمه وقفت في زوري ياسر جلال هبدني واحده علي ضهري بتوجعني لحد دلوقتي بس سلكت اللقمة قلت بصوت متحشرج لا يا استاذ انا خلصت الحمدلله قال اطفوا النور و قعدهم كلهم و قالي كمل السندوتش كملته و انت بطفحه طبعاً كاني ببلع زلط و اثناء ده استاذ علي اللي هو حبيب ابويا مسكني غسيل و مكوه من اللي قلبك ميحبهمش و بعد ما خلصت قالي خش يا حبيبي اغسل سنانك و ايدك دخلت الحمام قعدت اعيط زي العيال بشحتفه و محمد رياض و ياسر قعدوا يرزعوا عالباب بره عشان افتح مبفتحش".
وأشار "الاستاذ علي مسك المايك و قال اطلع يا ..... عايز اصور طلعت و عملت احسن مشهد ليا في الفيلم تقريباً ده اذا كان ليا مشهد حلو اصلاً بعدها الاستاذ خدني علي جنب و قالي انت محتاج تنشف و تتعلم اصول الشغلانه".
واختتم: "يعني الاستاذ كان بيعلمني و انا اتعلمت مكنش بيقهرني الرساله دي لكل واحد سولت ليه نفسه يغلط في الاستاذ الكبير عبد الرحمن ابو زهره الهي تنحشر اللقمه في زوركوا يا قللات الادب و التربية".
لمشاهدة المنشور اضغط هنا
