في أول ظهور صحفي... أحمد الهواري يحاور فيروس " كورونا "
الأحد 22/مارس/2020 - 09:22 م
بعد أن أصبح الأكثر شهرة علي مستوي العالم ، بعد أن تصدرت أخباره كل " التريندات " في كل وسائل التواصل و محركات البحث ، كان علينا محاولة الوصول له ومحاورته لنعرف منه تفاصيل أكثر ، ولد " كورونا " في ولاية " وهان " الصينية لأب و أم من طبقة بسيطة يصيبون فقط الحيوانات ولكنه تمرد علي حياته حتي أصبح يصيب البشر ويسبب الوفاة وحتى الآن لم يجد له الأطباء مصلاً .
في السطور القادمة سأحاول نقل ما دار بيني وبين " كورونا " في أول ظهور صحفي له في العالم .
هواري : مساء الخير عامل ايه ؟
كورونا ضاحكاً : أنا كويس المهم إنتوا عاملين إيه ؟
هواري محتداً : إنت بتهزر بعد كل اللي انت عامله في العالم ده ، خلي عندك دم الناس بتموت بسببك...
كورونا مقاطعاً : لأ مش بسببي ، الناس بتموت بسبب إستهتارهم بصحتهم وصحة اللي حواليهم ، إوعي تفتكر إني مش بتابع المواقع الإخبارية والقنوات الفضائية ، ده الناس لسانها دلدل وبرده الناس بتهمل وتستهتر ، أفوت بقي الفرصة دي !
هواري : طب بالنسبة للقعدة في البيت وإقتصاد العالم اللي بينهار ده ؟
كورونا : نعم ؟ هتقولي أنا السبب برده ؟ ، إنتوا السبب في كل ده يا راجل ده في عز الأزمة والناس بتموت في عندكم ناس في كل دول العالم بتعلي أسعار المستلزمات الطبية والأدوية والمنظفات ٥٠٠% ولا بيفرق معاهم كارثة ولا بيفرق معاهم مرض ، وبعدين هو إنتوا مش دائماً نفسكم في اجازة وبتفضلوا تشتكوا أديكم أخدتوها ومدفوعة الأجر كمان ، المفروض تشكروني .
هواري : هو إنت مين اللي قالك المعلومات دي ؟
كورونا : يا حبيبي انا بتابع كل حاجة في العالم وعندكم في مصر بتابع كل برامج " التوك شو " ، وبصراحة الناس لسانها دلدل عشان الإلتزام بالتعليمات وبرده مافيش فايدة معاكم .
هواري : طب هو انت مش هتخلص بقي وتريحنا منك
كورونا بغضب شديد : إتكلم بأدب ... مش معني إني وافقت أتكلم معاك إنك تتجاوز في الكلام ، إنت لما بتستضيف واحد طلع " تريند " عندكم في مصر يومين بتحترمه ، أنا تريند العالم كله ولا مش واخد بالك
هواري يخرج زجاجة " كحول " من جيبه ويلوح بها : شكلك انت اللي مش واخد بالك
الفيروس ينظر للزجاجة في رعب : إهدي يا أستاذ أحمد إحنا في نقاش حضاري
هواري : طب جاوب علي السؤال ؟
كورونا : حاضر هجاوب ، مافيش حاجة بتفضل ولا الحلو ولا الوحش ، أكيد هتلاقوا علاج ومصل ليا زي كل الأساتذة اللي سبقوني " سارس" و " فيروسc " و " أنفلونزا الخنازير "
هواري متعجباً : أساتذة !
كورونا : أيوه زي ما انت ليك أساتذة في شغلتك انا كمان ليا ، بس مش دي المشكلة ، المشكلة كام واحد هيموت لحد ما تلاقوا العلاج والمصل.
هواري يلوح بزجاجة " الكحول " : لأ ما هو انت هتقولي دلوقتي ازاي نعدي الموضوع ده لحد ما نخلص منك
كورونا بذهول : هو إنت لسة بتسأل ! ، يا عمنا انت مش بتشوف تليفزيون أو تقرأ أخبار أو حتي تسمع راديو !، عموماً هقولك ماهو مش سر ، النظافة في كل حاجة حواليك ، غسل اليدين بالصابون ، ترك مساحة كافية بينك وبين أي شخص ، البقاء في المنزل ، المطهرات مثل الكحول ، عدم الاختلاط والتجمع ، حلو كده ؟
هواري : ومالك كده بتقول النصائح اللي نخلص بيها منك وأنت مش قلقان ؟
كورونا : عشان أنا متأكد من إن في ناس عندها لا وعي وعدم مسؤلية ومش هيعملوا أي حاجة من الحاجات دي ، عارف إنت الواحد من دول ممكن ينقل العدوي لكام واحد ملتزمين وعندهم وعي ، أنا براهن علي الغباء والعند وغالباً بكسب
هواري : طب أنا كمان براهنك إننا هنخلص عليك والبداية هتكون في مصر وهنلتزم وهنفذ كل تعليمات وزارة الصحة لحد ما تروح زي اللي قبلك .
كورونا بتحدي : هنشوف
وهنا قمت برش كحول علي كورونا وراقبته وهو يختفي وسط توسلاته وصراخه
هذا الحوار غير حقيقي ومن وحي الخيال ، حفظ الله مصر وشعبها والعالم أجمع من كل الشرور .
أحمد الهواري
القاهرة ٢٢ مارس ٢٠٢٠
