رامي وحيد: مش مبسوط بقرار السنجلة‎

وكشف "رامي" في تصريح خاص لـ"وشوشة": "أنا مش مبسوط بقرار السنجلة لأن أكيد عاوز أكون مرتبط لكن مش لاقي حد مناسب وبيكون ليا طلبات معينة في الشخص اللي قدامي لما متتوافرش حاجة واحدة بواجه مشكلة وبحب الحرية جدا فعندي مشكلة في فكرة الارتباط لو هيقيد حريتي وبخاف من مسؤلية أن يكون في حد في حياتي مسؤل مني وانا أكيد مش ضامن ظروفي على كل المستويات سواء ظروف مادية ونفسية لأن المجال الفني له علاقة بالأهواء".

وأضاف: "دايما اللي بيركز في التفاصيل وبيدور على الكمال الدائم بيكون عنده مشكلة ودة في حد ذاته غلط مش صح مشكلة برجي الحمل يا كل حاجة يا ولا حاجة".

واستكمل حديثه قائلا: "أنا معنديش مواصفات لفتاة أحلامي يعني لو هنتكلم عن الجمال مش لازم تكون جميلة أوي أهم حاجة عندي تكون مريحة وتستحمل كل الظروف وتستحمل أهوائي".

وأكد قائلا:" معنديش مشكلة اتجوز ممثلة عادي.. المجتمع بيشوف أن الممثلة مش مؤدبة ودة إعتقاد خاطئ لأنها مهنة محترمة وممكن تكون زي وظيفة الرجال بالجيش في الالتزام المهني ودايما بشوف أن الفنان عشان يمثل لازم يكون عنده أرقى أنواع المشاعر فميش ممثلة معندهاش مشاعر واحاسيس او إنسانيات لكن المشكلة الوحيدة تكمن في أن وقت العمل يكون الضغط مضاعف فمين الفنانة اللي هتقدر تواظب بين بيتها وعملها الصعب، أعتقد لن تستطيع إلا لو كان زوجها قادر أنه يستحمل ويقدر عملها... أنا تركيبتي بتحتاج الاهتمام جدا والتفاصيل وأحب أنها تكون فاضية مش مشغولة ومركزة ومهتمة بيا وعلى فكرة كل دة ممكن ييتغير في لحظة وأتجوز حد مشغول جدا وأكون راضي".

وأضاف:" حاجات كتير أوي ممكن تكون سبب أن العلاقة تفشل.. منها أن إحنا ساعات مبنقبلش بعض في حاجات أو بنتجمل في البدايات ودي مشكلة كبيرة لأننا يجب أن نطرح عيوبنا من البداية ونتقبلها منمثلش على بعض اللي بيكون مختلف في المجتمع الأوربي أن كل الناس صريحة مع بعض ودة من أسباب نجاح العلاقات في الخارج".