أحمد جمال لـ"وشوشة": مش هعتمد على ألحاني بس.. وفرح عندها حرية الاختيار

كشف الفنان أحمد جمال عن تعاونه مع زوجته فرح الموجي في ألحان بعض أغانيها، مؤكدًا أنه لا يرغب في الاعتماد على ألحانه فقط خلال الفترة المقبلة، لرغبته في تقديم أعمال متنوعة وبأفكار وروح مختلفة.

وقال أحمد جمال في تصريح خاص لـ"وشوشة":"أنا عملت ده في أول أغنيتين، “مالي عيني” و”أول يوم في بيتنا”، الاتنين ألحاني، لكن مش عايز أعتمد على ده بس، لأن في المرحلة الجاية لازم إخواتنا وصحابنا الملحنين يبقى ليهم دور كبير، لأن طبيعي لازم يبقى في تنويع وفي اختيارات بشكل تاني وبروح جديدة".

وتابع أحمد جمال حديثه قائلاً:"أكيد فرح مش هتعتمد عليا بس، لكن هفضل طول الوقت بعرض عليها الألحان اللي أنا بعملها، اللي يعجبها منها تغنيه واللي ما يعجبهاش تسيبه، يعني أنا بديها حرية الاختيار دايمًا، مش ديكتاتور".

آخر أعمال أحمد جمال

وكان آخر الفنان أحمد جمال خلال الأسابيع الماضية أغنية على بالي خطر، وذلك في تعاون مع الشاعر مصطفى ناصر، بينما جاءت الأغنية من ألحان أحمد جمال، وذلك في تجربة غنائية جديدة يواصل من خلالها تقديم رؤيته الموسيقية الخاصة.

وتولى إلهام دهيمة وأحمد حسام مهام الميكس والماستر، وطرحت الأغنية عبر موقع يوتيوب ومختلف المنصات الموسيقية والرقمية.