شريف مكاوي لـ"وشوشة": تامر حسني أخويا قبل ما يكون نجم.. وأغنية "ماتمشيش" اتعملت في وقت قياسي

كشف الموزع الموسيقي شريف مكاوي كواليس تعاونه مع الفنان تامر حسني في أغنية "ماتمشيش"، إحدى أغنيات ألبوم مش هتكرر مؤكدًا أن الأغنية خرجت للنور بسهولة غير معتادة، وأنها من أسرع الأعمال التي نفذها في مشواره، مشيرًا إلى أن علاقته بتامر تتجاوز حدود العمل، إذ يعتبره شقيقًا قبل أن يكون زميلًا في الوسط الفني.

وتحدث شريف مكاوي في تصريح خاص لـ"وشوشة"، قائلًا: "تامر سمعني اللحن أول ما خلصه وكان هو كاتب وملحن الأغنية وعجبتني جدًا من أول لحظة قال لي إنه نفسه يقدمها بشكل مختلف، في ستايل إلكترونيك أو هاوس ميوزيك، وبالتحديد (Deep House)، والفكرة شدتني جدًا، ومن أول ما سمعتها رسمت التوزيع في دماغي".

وأضاف شريف مكاوي قائلاً:"الأغنية كانت متيسرة بشكل غريب اشتغلنا عليها في وقت قياسي، وحتى الانترو كان تامر مسجلهولي فويس نوت، والفواصل الموسيقية هو اللي مألفها المجهود الحقيقي كان في مرحلة الميكس، قعدنا حوالي 3 أو 4 ساعات نعمل 3 نسخ مختلفة لحد ما استقرينا على النسخة الأخيرة اللي نزلت للجمهور".

وأكد شريف مكاوي أن الأغنية لم تواجه أي صعوبات خلال تنفيذها، موضحًا:"بصراحة مكنش فيها أي تحديات، كنت حاسس الأغنية جدًا وعارف هاعمل فيها إيه من أول لحظة، وده مش بيحصل كتير، لأن شغلنا مع تامر عادة بياخد وقت ومجهود كبير عشان كل تفصيلة تطلع بأفضل شكل، لكن (ماتمشيش) كانت حالة مختلفة".

وعن كواليس التعاون، قال شريف مكاوي :"الغريب إن الأغنية كلها تقريبًا اتعملت بالتليفون، أنا ما شوفتش تامر غير يوم الماستر. كلمني الضهر، بعتلي اللحن وقال لي: الألبوم قرب ينزل وأنا عايزك معايا في الأغنية دي بدأت أشتغل في نفس اللحظة، وتاني يوم كنت بسمعه التوزيع، وكل حاجة تمت بسرعة كبيرة".

وعن تفاعل الجمهور أوضح:"الحمد لله في جمهور دايمًا بيستنى أي شغل يجمعني بتامر، وده بيسعدني جدًا الناس كانت متوقعة تسمع مني لون معين، والحمد لله حسيت إنهم لقوه في الأغنية، وده بالنسبة لي أكبر مكسب".

شريف مكاوي يوجه رسالة مؤثرة لتامر حسني

واختتم شريف مكاوي حديثه برسالة مؤثرة إلى تامر حسني، قائلًا:"تامر بالنسبة لي أخويا قبل ما يكون فنان إحنا أصحاب من قبل الشهرة، وأهلنا يعرفوا بعض، وعشنا مع بعض مراحل كتير في حياتنا، وعلاقتنا أكبر بكتير من الشغل هو من أكتر الناس اللي ممكن ألجأ لها لو عندي أي مشكلة، وبحبه جدًا مبسوط إن حب الناس ليه بيزيد كل سنة، لأنه يستحق، فهو فنان وإنسان حقيقي، ودايمًا بيشتغل على نفسه وبيتحدى نجاحه، وبيحاول كل سنة يبقى أفضل من اللي قبلها بتمناله كل التوفيق، وربنا يكرمه على قد تعبه، وإن شاء الله يفضل دايمًا ناجح ويقدم أعمال تفرح جمهوره".