مصطفى حدوتة لـ"وشوشة": "فلوس بابا" الأقرب لقلب بنتي

كشف الشاعر مصطفى حدوتة في تصريح خاص لـ”وشوشة”، عن كواليس ابتعاده النسبي عن كتابة أغاني المهرجانات خلال الفترة الماضية، مؤكدًا أنه كان بحاجة إلى منح نفسه فرصة أكبر للتركيز على الأغنية “البوب”، دون أن يعني ذلك التخلي عن المهرجانات.

مصطفى حدوتة: كنت محتاج بريك من المهرجانات

وقال مصطفى حدوتة: "اللي بيعمل مهرجانات لازم يعمل أغنية كل يوم، وده كان هيخليني مش قادر أركز في البوب. أنا كنت عايز أشتغل على الأغنية البوب بشكل أكبر، فكنت محتاج وقت وبريك من المهرجانات، لكن ده مش معناه إني بطلتها، بالعكس أنا لسه بعمل مهرجانات وهفضل طول عمري أكتبها".

يكشف الأغنية الأقرب لقلب ابنته

وتحدث مصطفى حدوتة عن الأغنية التي تعشقها ابنته من أعماله، قائلًا:"بصراحة أغنية (فلوس بابا) هي أكتر أغنية بنتي بتطلب مني أشغلها، ومعلقة معاها جدًا السنة دي أما أغنية (الألوان) فهي لسه جديدة، ولسه في ثالث يوم من طرحها، فممكن مع الوقت تحبها هي كمان".

عن التعاون مع روبي: حاولنا 3 سنوات

وعن تعاونه مع الفنانة روبي في أغنية “الحب إيه”، أوضح:"روبي حبيبتي، وإحنا بقالنا 3 سنين بنحاول نشتغل مع بعض جربنا أكتر من مرة، وسمعت أكتر من أغنية، ودخلت سجلت حاجات لكن ما حصلش توافق الحمد لله السنة دي ربنا كرمنا وطلعنا بأغنية (الحب إيه)، والأجمل إنها بقت اسم الألبوم، ودي أول مرة في مشواري أغنية من كلماتي تكون عنوان ألبوم كامل".

“مخصماك”.. أغنية كادت تذهب إلى لميس

وكشف مصطفى حدوتة عن موقف حدث مع أغنية “مخصماك”، قائلًا:"حصل قبل كده إن فنان ندم إنه ما أخدش أغنية لكن مش بحب أقول كلمة ندم أقدر أتكلم عن (مخصماك)، لأنها كانت في البداية معمولة للميس بعد نجاح (مسيطرة)، لكن هي كانت مصممة إنها لأ، وفي النهاية الأغنية راحت لحد تاني وحققت النجاح اللي الناس شافته".

مفاجأة مع محمد منير

واختتم مصطفى حدوتة حديثه بالكشف عن أحدث مشروعاته الفنية، قائلًا:"إن شاء الله، وبتمنى ربنا يتممها على خير، بنسبة كبيرة ممكن أكون موجود في ألبوم الكينج محمد منير الجديد".