دنيا عبد العزيز لـ”وشوشة”: نجاح “المداح” كان مفاجأة لنا جميعًا

أكدت الفنانة دنيا عبد العزيز أن النجاح الكبير الذي حققه مسلسل “المداح” منذ عرض جزئه الأول لم يكن متوقعًا من أي فرد من صناع العمل، مشيرة إلى أن النجاح الحقيقي بيد الله وحده، ولا يمكن لأي فنان أن يضمنه مهما كانت خبرته.

وقالت دنيا عبد العزيز في تصريح خاص لـ”وشوشة”: “مفيش حد يقدر يتوقع نجاح أي عمل، حتى لو أهم نجم في الكوكب، وياما أعمال ناس توقعت لها نجاح كبير وفشلت، وياما أعمال ناس استهانوا بيها وكسرت الدنيا. إحنا بنعمل اللي علينا والنجاح بتاع ربنا".

وأضافت: “الفنان اللي مايقلقش على شغله ويحس إنه ناجح كده كده، يبقى خسر كل حاجة. لازم طول الوقت يبقى عنده خوف واجتهاد ورغبة إنه يقدم أفضل حاجة".

وعن مشاركتها في الجزء الأول من “المداح”، أوضحت: “أنا روحت أعمل المسلسل وأنا متوقعة إنه هيبقى عمل بسيط ولذيذ، وحمادة هلال إنسان رائع، لكن اتفاجأنا كلنا بالنجاح الساحق اللي حققه. مكنتش متوقعة، ولا إحنا ولا حتى حمادة نفسه كنا متوقعين النجاح بالشكل ده".

واختتمت حديثها مؤكدة أن وجود سيناريو جيد، ومخرج متميز، واجتهاد فريق العمل كلها عوامل مهمة، لكنها لا تكفي وحدها، قائلة: “أكيد الورق الحلو والمخرج الشاطر والاجتهاد عوامل مهمة، لكن في النهاية التوفيق والنجاح من عند ربنا".