محمد محمود لـ"وشوشة": “كريبتو” تجربة جديدة.. وأوس أوس وحمدي الميرغني من تلاميذي
تحدث الفنان محمد محمود عن مشاركته في فيلم “كريبتو”، مؤكدًا أن العمل يمثل تجربة مختلفة بالنسبة له، مشيدًا في الوقت نفسه بالتطور الكبير الذي تشهده صناعة السينما في المملكة العربية السعودية.
وقال محمد محمود في تصريح خاص لـ”وشوشة”: “فيلم “كريبتو” تجربة جديدة بالنسبة لي، والحمد لله العمل بيضم مجموعة متميزة، سواء المخرج السعودي أو جهة الإنتاج، وده شيء جميل لأن الناس هناك بتتقدم بسرعة كبيرة جدًا، وده بقى واضح في المسرح والسينما والدراما".
وتابع: “كنت في السعودية وشوفت الاستوديوهات الجديدة اللي اتعملت في الرياض، وانبهرت بالتطور الموجود، وحاسس إن التجربة هتكون ناجحة، خصوصًا إن الكتابة حلوة جدًا، وإحنا دلوقتي بنعمل بروفات ومبسوطين جدًا باللي بنقراه".
وأضاف: “قعدنا جلسة عمل وعدلنا بعض التفاصيل في السيناريو، وحاسس إن الجمهور هيشوف حاجة مختلفة فيها مجهود كبير".
وعن شخصيته في الفيلم، أوضح: “بقدم شخصية عم الشباب اللي جُم من إيطاليا علشان يرثوا ممتلكات والدهم، وأنا العم الطيب اللي بيحتويهم جدًا، لكن في النهاية بيحصل تطور ومفاجأة مش هيتوقعها الجمهور، والفيلم في الأساس كوميدي".
وتحدث محمد محمود عن كواليس العمل مع أوس أوس وحمدي الميرغني وبيومي فؤاد، قائلاً: “بيومي اشتغلنا مع بعض قبل كده في المسرح، أما أوس أوس وحمدي الميرغني فهما من تلاميذي، وأنا أول واحد تنبأت إن ليهم مستقبل كبير في الكوميديا".
واستكمل: “وقت ما كنت مدير المسرح الكوميدي كانوا بيقدموا مسرحية اسمها “شيزلونج”، وكنت بجيب الناس تتفرج عليهم لإيماني بموهبتهم، وكمان طلبت وقتها نعمل لهم أفيش بصورهم، وبعدها أشرف عبد الباقي ضمهم لفرقته، والحمد لله بقوا من أهم نجوم الكوميديا، وده أسعدني جدًا".
وكشف عن أعماله المقبلة، قائلاً: “بعد انتهاء كأس العالم هنعلن موعد عرض الجزء الثاني من مسلسل “بيت بابا”، والحمد لله باقي لي يوم تصوير واحد فقط، وكمان مضينا على الجزءين الثالث والرابع بعد النجاح الكبير اللي حققه الجزء الأول".
واختتم محمد محمود تصريحه برسالة دعم للمنتخب المصري، قائلاً: “يارب سعادتنا تستمر وما تبقاش مؤقتة، وإن شاء الله نحقق فوز جديد، وبعدها ربنا كبير، ونكون على قد مواجهة الأرجنتين".
