رانيا فريد شوقي لـ"وشوشة": 30 يونيو أعادت لنا مصر.. وأحلم بوطن أقوى لأبنائنا وأحفادنا

وصفت الفنانة رانيا فريد شوقي ذكرى ثورة 30 يونيو بأنها من أغلى الذكريات في حياتها، مؤكدة أنها كانت لحظة استرداد الوطن بعد شعور صعب عاشه المصريون، كما أعربت عن أمنياتها بأن تواصل مصر مسيرة التقدم، وأن ينعم شعبها بالاستقرار والرخاء، متمنية مستقبلًا أفضل للأجيال القادمة.

وتحدثت رانيا فريد شوقي في تصريح خاص لـ"وشوشة" قائلة:"ذكرى 30 يونيو طبعًا ذكرى غالية قوي قوي، يعني لما تحسي إن بلدك اتخطفت منك ورجعت لك، أنا فاكرة يوميها من الفرحة القلب كان هيوقف، من الراحة والفرحة، كانت حالة عامة في البيوت والشوارع، تحسي إنك استرديتي بلدك".

وتابعت رانيا فريد شوقي حديثها قائلة:"وأكتر حاجة بفتكرها في 30 يونيو إنك كنتي بتحسي إن مصر مضلمة، لكن في 30 يونيو كانت عودة الروح، يعني روحي رجعتلي مع 30 يونيو".

وأضافت رانيا فريد شوقي حديثها قائلة:"لا ما فيش عمل فني معين في بالي وثق الأحداث، في أعمال اتعملت، لكن للأسف يمكن مش في دماغي دلوقتي، يمكن الاختيار، يمكن مش عارفة بالظبط".

واستكملت رانيا فريد شوقي حديثها قائلة:"أمنيتي لمصر… دايمًا عندي أمنيات لمصر، نفسي أشوفها أحسن بلد في الدنيا، ونفسي الشعب المصري يبقى مرتاح، مرتاح ماديًا ونفسيًا ومعنويًا، ونفسي نقضي على الفساد، ونفسي أي حد في شغله يبقى عنده ضمير، ونفسي نبقى بلد متطورة تكنولوجيًا ونواكب العصر اللي إحنا عايشين فيه".

واختتمت رانيا فريد شوقي حديثها قائلة:"نفسي في حاجات كتير قوي، ولو اتمنيت لبلدي هتمنى كل حاجة حلوة، ونفسي ألحق أشوف ده طبعًا في إنجازات كتير حصلت وما حدش يقدر ينكرها، لكن إحنا بقينا طماعين، بقينا عايزين الأكتر والأكتر، لأننا ما بقيناش بنحلم لنفسنا بقدر ما بنحلم لولادنا وأحفادنا، ونشوف مصر أحسن وأقوى وأعلى، وإن شاء الله ربنا هيحقق لنا أمانينا كلها".

ثورة 30 يونيو.. محطة فارقة في تاريخ مصر

وتُعد ثورة 30 يونيو من أبرز المحطات في التاريخ المصري الحديث، إذ خرج ملايين المصريين في مختلف المحافظات يوم 30 يونيو 2013 للمطالبة بإجراء انتخابات رئاسية مبكرة، قبل أن تعلن القوات المسلحة في 3 يوليو 2013 خارطة طريق تضمنت تعطيل العمل بالدستور بشكل مؤقت، وتعيين رئيس مؤقت للبلاد، تمهيدًا لإجراء انتخابات رئاسية وبرلمانية وصياغة دستور جديد.

احتفال سنوي بذكرى الثورة

وتحرص الدولة المصرية على إحياء ذكرى ثورة 30 يونيو سنويًا من خلال فعاليات ورسائل رسمية تؤكد أهمية المناسبة في التاريخ الوطني، فيما يستعيد عدد من الفنانين والشخصيات العامة ذكرياتهم عنها، معبرين عن رؤيتهم لما مثلته من مرحلة مفصلية في مسار الدولة المصرية، وما أعقبها من تطورات على مختلف المستويات.