أمير طعيمة لـ"وشوشة": نجاح حماقي بهذه القوة مكسب للصناعة كلها

تحدث الشاعر أمير طعيمة عن كواليس تعاونه مع الفنان محمد حماقي في ألبوم سمعوني، كاشفًا تفاصيل رحلة العمل الطويلة التي سبقت طرح الألبوم، والأسباب التي جعلت الأغاني تخرج بهذا التنوع والاختلاف، كما أشاد بالمجهود الكبير الذي بذله حماقي خلال مراحل التحضير والتنفيذ، مؤكدًا أن الألبوم يمثل محطة مهمة في مسيرته الفنية.

وتحدث أمير طعيمة في تصريح خاص لـ"وشوشة" قائلًا:"إحنا اشتغلنا على الألبوم وقت طويل جدًا البداية كانت من أكتر من سنتين، وبعدها هدينا شوية، لكن خلال السنة الأخيرة كنا شغالين بشكل متواصل أنا بطبيعتي لما بشتغل مع حماقي وبلاقي إن عندي أكتر من أغنية في الألبوم، بحاول كل مرة أقدم لون مختلف، يعني لو عملت أغنية درامية أفكر بعدها في أغنية مقسوم أو شرقي أو لون مختلف، لأن ده بيفيد المطرب وبيفيدني كمان كصانع أغاني، والحمد لله ده ظهر في الأغاني اللي نزلت، لأن الحالات والأفكار كلها مختلفة ومش مكررة".

وتابع أمير طعيمة حديثه قائلاً:" اشتغلنا على حوالي 10 أو 11 تراك، وفي النهاية حماقي اختار الست أغاني اللي نزلوا، وفي كمان أغنية “إلا قوليلي” اللي الناس سمعت التيزر الخاص بيها ومن المفترض تنزل قريب، وأنا مبسوط إن الجمهور مركز مع فكرة إن الأغاني مختلفة ومش شبه بعضها كان عندنا كمان أغنية دراما مهمة جدًا لكن كانت محتاجة شغل أكتر في التوزيع والميكس، وحماقي قرر تأجيلها، وأعتقد إن قراره كان صحيح".

واستكمل أمير طعيمة حديثه قائل:"أما بالنسبة لأغنية “قالوا عني إيه”، فأعتقد إن سر اختلافها إن الناس متعودة إن الأغاني الوجع أو الدرامية تبقى هادية جدًا، لكن لما سمعت اللحن حسيت إن المفروض تتكتب بالشكل ده، وحماقي كان مقتنع بنفس الديركشن".

وأردف أمير طعيمة قائلاً:"الأغنية كان ممكن تتقدم بشكل أكثر بهجة بسبب جملة “غلطة غلطة”، لكن أنا شفت إن التطور النفسي للشخصية داخل الأغنية أهم، لأنه في البداية بيحاول يفهم إيه اللي حصل وليه التغيير ده حصل، وبعدها بيدخل في مرحلة رفض لفكرة إن الشخص اللي بيحبه صدق أي كلام عنه، لحد ما يوصل لمرحلة تلخيص الحكاية كلها في جملة “غلطة”، وكأنه بيراجع التجربة بالكامل".

وتابع أمير طعيمة حديثه قائلاً :"كمان لحن عمرو مصطفى كان مختلف وجديد، وحماقي من المطربين اللي بيعرفوا يصدقوا الكلام جدًا، وده بيوصل الإحساس للناس بأفضل صورة، وعشان كده متوقع للأغنية نجاح أكبر خلال الفترة المقبلة".

وأضاف أمير طعيمة قائلاً:"وبالنسبة للتحديات، فأنا ما بحبش أسميها تحديات، إحنا بنشتغل على حاجة بنحبها وعارفين إحنا عايزين نوصل لإيه حماقي من الفنانين اللي عندهم قدرة كبيرة على إخراج الشغل في أحسن صورة، وبيكون له دور مهم جدًا في التنفيذ والتوزيع واختيار التفاصيل النهائية".

وأردف أمير طعيمة قائلاً:"في مطربين بحب أتابع معاهم الأغنية لحد الميكس والماستر، لكن حماقي من الفنانين اللي بثق فيهم بشكل كامل لأنه قادر يطلع الشغل بأفضل شكل ممكن".

واستكمل أمير طعيمة حديثه قائلاً:"هو كمان شال عبء كبير جدًا في الألبوم ده، سواء في أغانيه أو أغاني باقي الزملاء، والجمهور بيقدر المجهود ده حماقي كان ممكن ينزل الألبوم من الصيف اللي فات، وبعدها اتأجل لأكتوبر ثم نوفمبر، لكنه كان حاسس إن الألبوم لسه مش جاهز، وفضل ياخد وقته لحد ما وصل للشكل اللي هو مقتنع بيه، ودي حاجة تُحسب له".

وتابع أمير طعيمة حديثه قائلاً:"وفيما يخص إعادة كتابة الأغاني، الناس دايمًا بتتخيل إن الأغاني الدرامية هي اللي بتاخد وقت طويل، لكن الحقيقة العكس تمامًا أغنيات زي “قالوا عني إيه” أو “عشان حبيتك” خرجت بسرعة لأن الإحساس كان واضح من البداية أما أغنية “سمعوني” فهي أكتر أغنية أخدت وقت معانا، خصوصًا في الكوبليهات بعد ما خلصنا النسخة الأولى حس حماقي إن الأغنية قصيرة، فقررنا نفتحها تاني ونضيف كوبليه جديد".

وأضاف أمير طعيمة قائلاً:"الناس أحيانًا بتفتكر إن الكلمات السهلة بتتكتب بسرعة، لكن ده مش حقيقي، لأن الأغنية السريعة بيبقى فيها حسابات كتير جدًا مرتبطة بالفوناتيك وتقطيع الكلمات على اللحن ممكن تكتبي كلام جميل جدًا لكن ما يقعدش على اللحن بالشكل المطلوب، وبالتالي ما يوصلش للناس. عشان كده الأغاني السريعة غالبًا بتاخد وقت أطول من الأغاني الدرامية وفعلاً “سمعوني” استغرقت وقتًا رهيبًا، وفكرتني بأغنية “من قلبي بغني” اللي أخدت مننا وقتًا طويلًا جدًا رغم بساطة كلماتها".

وتابع  أمير طعيمة حديثه قائلًا:"حماقي بالنسبة لي مش مجرد رفيق مشوار، حماقي جزء من المشوار نفسه. لما أغنية “إلا قوليلي” تنزل هتبقى الأغنية رقم 60 تقريبًا في تاريخ تعاوننا مع بعض، ما بين ألبومات وإعلانات وأعمال دعائية وأغاني مختلفة إحنا بنعرف نطلع شغل كويس لأن بينا ثقة كبيرة واحترام لموهبة بعض، وكل واحد عارف قيمة التاني".

وأستكمل أمير طعيمة حديثه قائلاً:"وعلى المستوى الشخصي، أنا بعتبر حماقي أخويا أكتر من كونه صديق، وبحطه في نفس المكانة اللي بحط فيها إخواتي، لأن بينا عشرة عمر طويلة وعشرة نجاح. هو من أقرب الناس ليا، وتعب بشكل رهيب في الألبوم ده، وأنا تعبت في الست أغاني اللي شاركت بيهم، فما بالك هو اللي كان بيتابع 12 أغنية وأعمال تانية وكمان تفاصيل هندسة الصوت والتنفيذ".

أمير طعيمة عن سعادته بردود أفعال على الالبوم

واختتم أمير طعيمة حديثه قائلاً:"أنا سعيد جدًا برد فعل الناس على الألبوم، لأن عودة حماقي بالقوة دي مهمة للصناعة كلها، فهو مطرب مهم وله مكانته وأعتقد إن “سمعوني” هيبقى من المحطات المضيئة جدًا في مشواره، زي ألبومات شكلت نقلات كبيرة قبل كده أي فنان مهما حقق من نجاح بيبقى عنده محطات فارقة في تاريخه، وأعتقد إن الألبوم ده واحد من المحطات دي، وبشكر كل صناع الألبوم لأنهم قدموا أفكارًا وأغاني وموسيقى مختلفة ومميزة، واتمنى لحماقي التوفيق دائماً".