إلهام شاهين لـ"وشوشة": فستان العيد كان بينام جنبي من فرحتي بيه
تحرص الفنانة إلهام شاهين على الاحتفال بعيد الأضحى وسط أجواء عائلية خاصة، مؤكدة أن العيد بالنسبة لها يرتبط دائمًا بلمة الأسرة والعادات التي لا تتغير مهما مرت السنوات، خاصة الطقوس المرتبطة بأول أيام العيد والأكلات التقليدية التي تحمل ذكريات الطفولة.
وتحدثت إلهام شاهين في تصريح خاص لـ"وشوشة"، قائلة:"طقوسي في عيد الأضحى إني بتلم مع العيلة، وطبعًا أول يوم العيد لازم الدبح، واليوم الوحيد في السنة اللي بناكل فيه لحمة ضاني والفتة، دي أكلات مرتبطة بالنسبالي بالعيد، وإن العيلة كلها تتلم وناكل الفتة واللحمة، فإحنا مبنعملهاش طول السنة، هو اليوم ده بس".
وأضافت إلهام شاهين قائلة:"أكتر حاجة بحبها إني أكل مع عيلتي، أخواتي وولاد أخواتي، واللمة دي بالنسبالي أهم حاجة في العيد".
إلهام شاهين عن اكثر مايفرحها في عيد الاضحى
كما استعادت إلهام شاهين ذكريات طفولتها مع العيد، مؤكدة أن فرحتها زمان كانت مختلفة وبسيطة، وقالت:"أكيد الطقوس القديمة وإحنا صغيرين كانت مختلفة، العيدية كانت مهمة جدًا حتى لو كانت حاجة بسيطة، كانت مسألة رمزية لكنها بتفرحنا جدًا".
واختتمت إلهام شاهين حديثها قائلة: “ومن أكتر الحاجات اللي كانت بتفرحني فستان العيد، كان مهم جدًا بالنسبالي، لدرجة إني كنت ممكن أنيمه جنبي على السرير وأنا صغيرة من كتر فرحتي إني هلبسه الصبح، دي كانت فرحة الأطفال، لكن لما كبرنا الطقوس دي اختلفت شوية".
