طارق الدسوقي: طلب العمل حق.. ومش عيب إن الفنان يذكّر بوجوده
نظمت مجموعة “وشوشة” الإعلامية ندوة خاصة لتكريم الفنان طارق الدسوقي، تقديرًا لمسيرته الفنية الطويلة وما قدمه من أعمال مميزة في الدراما والسينما، بحضور عدد من الصحفيين.
وخلال حديثه علق طارق الدسوقي في تصريح خاص لـ"وشوشة" على الجدل المثار حول بعض الفنانين الذين يطالبون بفرص عمل عبر صفحاتهم على مواقع التواصل الاجتماعي، مؤكدًا أن الأمر لا يجب أن يُفهم بشكل سطحي أو يُحكم عليه بشكل قاسٍ، موضحًا أن لكل فنان ظروفه المختلفة.
وقال الدسوقي: “مستحيل أطلب من حد شغل، واللي بيعملوا كده ويطلعوا يطلبوا شغل على صفحاتهم أكيد معذورين. أنا مقدرش أعمل كده لأن ربنا ساترها معايا وبقدر أعيش حياة كريمة، لكن ممكن زميل تاني يكون معندوش نفس الظروف، وكل الأبواب اتقفلت في وشه، فطبيعي جدًا يطالب بعمل، وده حقه”.
وأضاف: “فيه فنانين بيبقوا قعدين في بيوتهم سنين، ومن حقهم يقولوا يا مخرجين يا منتجين يا شركات إحنا موجودين وعايزين نشتغل، ده مش عيب خالص، بالعكس ده حقهم الطبيعي”.
وتابع الدسوقي مؤكدًا أن هذا المطلب لا ينتقص من قيمة الفنان، بل يعكس احتياجه للفرصة: “أنا شخصيًا ما عملتش كده ومش بعرف أعمله، لكن لو اتحطيت في نفس الموقف ممكن أتصرف بنفس الطريقة، لأن ده شغلي ومن حقي يكون ليا فرصة، ومن حق أي فنان إن النقابة أو الجهات المعنية توفر له فرص عمل”.
واختتم حديثه قائلًا: “الموضوع ببساطة إن الفنان لما يطلب شغل مش بيشحت، هو بيفكّر الناس إنه موجود ولسه عنده حاجة يقدمها”.
يذكر أن آخر أعمال الفنان طارق الدسوقي كان مسلسل “علي كلاي” الذي عُرض في موسم رمضان الماضي، وشارك في بطولته كل من أحمد العوضي ودرة ويارا السكري ومحمود البزاوي ورحمة محسن وهدير عبد الناصر وعصام السقا.
