ياسمين عز: "أنتي قادرة يا شيماء وضحكتك بتجيب آخر فيصل فمتمثليش"
قالت الإعلامية ياسمين عز خلال برنامجها “كلام الناس” المذاع عبر قناة “MBC مصر”، إن النساء قادرات على مواجهة صعوبات رمضان وممارسة حياتهن اليومية رغم التعب والإرهاق.
ياسمين عز: “قومي دور الضحية مش هيحل حاجة”
وأضافت عز مخاطبة المشاهدات: “لما تتعبي في رمضان من كتر الوقفة على رجليكي وعيلك السلاحف يجننونكي ويصعب عليكي نفسك بعد الفطار، أول ما تفكري تنزلي دمعتين وتعيشي دور الضحية، فوقي يا شيماء وافتكري إنك ست قادرة، ميقدرش عليكي غير ربنا”.
تجاوز آلام البرد والإرهاق
وتابعت: “ولما يجيلك دور برد عادي في رمضان، بلاش ندخل عليكي الأوضة ونلاقيكي بتكتبي في وصيتك، ده دور برد عادي وهتقومي تقفي على رجلك وتقومي تعملي السحور، وأنتي بتموتي، يا شيماء”.
التعامل مع متطلبات الزوج والأطفال
وأضافت: “جوزك هيقولك الفول عاوز ملح، هاتي الملح وموتي، وبعد الشر عليكي وعلي اللي حواليكي، وبلاش لما تلاقي الدنيا هادية عندكم في البيت تجيبي عيالك توصيهم على بعض”.
واختتمت عز حديثها: “أنتي مش هتموتي، أنتي قادرة ومش هيحصلك حاجة في رمضان، أنتي من المعمرين في الأرض، عشر دقايق بالظبط هتجيلك جارتك أو اختك، هتلاقي ضحكتك آخر فيصل تقاطع الهرم، فمتمثليش”.
وفي وقت سابق، وجهت الإعلامية ياسمين عز مجموعة من النصائح المهمة للأمهات، مؤكدة أن الصبر والهدوء هما الأساس في التعامل مع الأطفال خلال هذا الموسم المزدحم بالنشاطات الأسرية والروتين اليومي.
وقالت ياسمين عز: “لو أنتي أم جديدة أو قديمة في رمضان، الأمومة هتديكي بريق زي البرق، هالات تحت العين وانعدام النوم، وحواجب منكوشة، هي دي الأمومة، أحلى لمعة في الدنيا”.
وأضافت أن الأمومة تجربة مليئة بالتحديات، لكنها تمنح المرأة شعورًا لا يقدر بثمن.
التعامل مع المواقف اليومية بهدوء
وأكدت أن الأمهات كثيرًا ما يقعن في فخ القلق الزائد بسبب تصرفات الأطفال اليومية، مثل سقوط العصير أو انسكاب الطعام: “أنتي في الأمومة بيصدر منك أفعال غريبة، ليه راعبة العيال وجوزك؟ ماتزعليش لو ولادك وقعوا العصير على الأرض أو الكنبة”.
وأضافت: “السجادة مش أهم من أطفالك ولا من صحتك النفسية، ليه نعمل حوارات كبيرة عشان العصير اتسكب؟ المج اتكسر والسجادة باظت، ده خير، جوزك عاوزه خيرك وأنتي اللي جايباهم”.