كاملة أبو ذكري: عادل إمام كان بيسمع كلام مساعد المخرج ويقول حاضر

كشفت المخرجة الكبيرة كاملة أبو ذكري عن حبها الشديد للعمل كمساعد مخرج، أكثر بكثير من حبها للسفر مع أصدقائها أو مع عائلتها.
وخلال السطور التالية ينقل لكم موقع وشوشة أبرز تصريحاتها خلال استضافتها في برنامج "ضيفي" مع الإعلامي الكبير معتز الدمرداش.

ذكريات كاملة أبو ذكري مع عادل إمام

قالت المخرجة الكبيرة كاملة أبو ذكري:"أنا كل يوم كنت بشوف عادل إمام، وأقول له: يا أستاذ عادل غير مكانك.. أو السيجارة ما كانتش كده في إيدك الشمال دي كانت في إيدك اليمين، أو حضرتك ما كنتش قاعد كده… وعادل إمام نجم كبير، وبرغم من كده كان بيسمع كلام مساعد المخرج؛ لأنه فنان حقيقي وبيقدر الفن."

ومع أحمد زكي… رؤية مختلفة ولكن احترام كبير

وأضافت:"كمان كنت كل يوم بشوف أحمد زكي… أحمد زكي مش طول الوقت كان بيسمع كلام مساعد المخرج، لأنه عنده وجهة نظر تانية، لكن فكرة إني أبقى بشوف أحمد زكي وعادل إمام دي بالنسبة لي كانت أهم حاجة… أهم بقى من الخروج والفسح والكلام ده."

رؤية أحمد زكي وعادل إمام أهم من السفر والبحر

وفي سياق متصل، أعربت المخرجة الكبيرة كاملة أبو ذكري عن اختيارها للعمل، ورؤية الفنان عادل إمام والفنان أحمد زكي، مؤكدة أن هذا الشيء بالنسبة لها أهم بكثير من السفر مع أصدقائها أو عائلتها.
وقالت:"أنا بالنسبة لي على أيامي كانت العجمي… إني أروح العجمي وأنزل البحر وأتفسح وأخرج… كان بالنسبة لي كل ده ملهوش أي لازمة قصاد إني أشوف كل يوم النجم عادل إمام والنجم أحمد زكي… مش عايزة أروح العجمي، مش مهم بالنسبة لي… المهم إني أشوفهم."

وكانت قد كشفت المخرجة كاملة أبو ذكري أن هناك تغييرًا جذريًا حدث في مهنة الإخراج، وقالت:"دي كانت مهنة وبعدين بقت مهنة تانية… يعني مثلًا أنا كنت بشتغل دكتورة بقيت بشتغل… فتحت محل كباب."

الإنسان ثابت لكن المهنة تغيرت

وأوضحت قائلة:"الإنسان هيفضل نفس الإنسان… يعني أنا كاملة، ولكن المهنة اتغيرت."

وأشارت أن هذا التغير أثر بشكل كبير على المجال الفني.