لبلبة: نفسي أقدم دور بيتكلم عن الإعاقة

تحدثت الفنانة القديرة لبلبة عن الدور الذي تتمنى تقديمه في مسيرتها الفنية.
وخلال السطور التالية ينقل لكم موقع وشوشة أبرز تصريحاتها خلال لقائها مع الإعلامية سالي شاهين على هامش حضورها حفل افتتاح الدورة ال46 من مهرجان القاهرة السينمائي الدولي.

أعربت الفنانة الكبيرة لبلبة عن سعادتها الكبيرة بالمشاركة في هذه الدورة المميزة.
وقالت:"أنا سعيدة جداً بحضوري مهرجان القاهرة السينمائي الدولي في دورته ال46، وكمان مبسوطة بإفتتاح المتحف المصري الكبير، ومن كتر سعادتي بإفتتاح المتحف، قررت ألبس فستان بذوق فرعوني في المهرجان علشان أعبر عن فخري وسعادتي بهذا الحدث العظيم."

ذكريات لا تُنسى مع مهرجان القاهرة السينمائي الدولي

وإسترجعت الفنانة القديرة لبلبة ذكرياتها مع مهرجان القاهرة، قائلة:"أكتر ذكرى بحبها لما إتكرمت في المهرجان، وماقلتش لحد إن يوم التكريم كان يوم عيد ميلادي."

وأضافت:"وأنا بتكرم كنت بتكلم عن حبي للسينما وعن والدتي، واتأثرت جداً، وحكيت إن والدتي جالها وجع الولادة وهي في السينما، وكانت عايزة تقعد تكمل الفيلم، لكن ماقدرتش، ولحقوها وودوها المستشفى، ولو ما كانتش راحت كان زماني اتولدت جوه السينما."

حب الفن والرسالة الإنسانية في أعمالها

وأوضحت لبلبة أن تلك الحادثة كانت من العلامات التي جعلتها تحب التمثيل منذ الصغر، قائلة:"أنا ما ينفعش أكون حاجة غير فنانة، ربنا خلقني علشان أقدم سعادة وفن للناس، وأقدم لهم شيء جميل يبهرهم ويتعلموا منه حاجات كتير، علشان كده أنا مركزة جداً في اختياراتي، ومابقبلش أي فيلم، لازم يكون فيه رسالة أو هدف أو فكرة معينة حابة أوصلها للجمهور."

الدور الذي تتمنى لبلبة تقديمه

وفي إطار حديثها عن إختياراتها الفنية، كشفت الفنانة القديرة لبلبة عن الدور الذي تتمنى تقديمه، وقالت:"لسا نفسي في حاجات كتير، واللي قدمته يمكن نص قدراتي التمثيلية بس، نفسي أقدم عمل يناقش قضية الإعاقة، يا إما أكون عندي بنت معاقة، أو أكون أنا اللي عندي مشكلة وهما بيراعوني، مش عارفة أحدد، بس نفسي أوصل للجمهور رسالة مهمة."

وأضافت:"الرسالة هي إن لما تشوفوا حد عنده إعاقة، تحمدوا ربنا، وماتتريقوش أو تضحكوا أو تقللوا منه، لأن ربنا خلقنا كلنا زي بعض، وعايزة أقول لكل بيت فيه طفل أو شخص عنده إعاقة؛ أنتم عندكم ملاك في البيت."

لبلبة تطالب بترميم أول أفلامها

واختتمت الفنانة القديرة لبلبة حديثها بالإشارة إلى الفيلم الكلاسيكي الذي تتمنى أن يعيد مهرجان القاهرة السينمائي ترميمه، قائلة:"هختار أول فيلم ليا، حبيبتي سوسو، لأنه فيلم مش مشهور ومش كل الناس عارفاه، ومش موجود في أي مكان، كنت وقتها عندي خمس سنين، وفي الفيلم ده سموني لبلبة، ومن وقتها والاسم فضل معايا."