بسمة وهبة تحذر النساء: "اللي يقولك أنا مش سعيد في حياتي.. يبقى غدار"
وجهت الإعلامية بسمة وهبة رسالة حاسمة إلى النساء، حذرت فيها من الانسياق وراء أكاذيب بعض الرجال الذين يحاولون كسب عطف المرأة بادعاء التعاسة في حياتهم الزوجية.
وقالت وهبة، خلال فيديو عبر حسابها علي إنستجرام :"بصي يا ست الستات، يا حلوة يا جميلة، خلي بالك.. الراجل اللي يجي يقولك أنا مش سعيد في حياتي، ومن ساعة ما شوفتك وأنا عرفت معنى السعادة الحقيقية، ده بيضحك عليكي".
"الراجل ده خارب البيت"
أوضحت بسمة وهبة أن هذا النوع من الرجال يحاول الظهور في دور المظلوم، بينما في الحقيقة هو السبب في خراب بيته وإيذاء أسرته.
وأضافت:"هو يقولك أنا بنام على الكنبة وهي في الأوضة، شوفي بكلمك في التليفون وهي مش دريانة، أنا روحي في الولاد، ولولاهم كنت طلقتها من زمان… لا يا حبيبتي، هو خارب البيت بالفعل".
وأكدت أن الرجل الذي يتخلى عن زوجته بعد سنوات طويلة من الدعم والمساندة، ليس مخلصًا، ولن يكون أمينًا مع امرأة أخرى:"اللي غدر بالست اللي عاش معاها 10 و15 و20 سنة، عمره ما هيبقى مخلص معاكي".
"الضحية الحقيقية هم الأولاد"
وشددت وهبة على أن المتضرر الأكبر من هذه التصرفات هم الأبناء، الذين يدفعون ثمن أنانية الوالدين وسوء اختياراتهم، وقالت:"في الآخر اللي بيدفع الفاتورة هم الولاد، خلي بالكم الولاد. بطلوا أنانية، أنت مش بتحب ولادك قد ما بتحب الست الجديدة اللي عرفتها".
"التعدد سمعنا وأطعنا.. لكن فين العدل؟"
تطرقت الإعلامية إلى قضية تعدد الزوجات، مؤكدة أنها ليست ضد الشرع، لكنها ترى أن أغلب الرجال لا يستطيعون تطبيق العدل كما أمر الإسلام.
وأضافت وهبة:"يا جماعة، التعدد سمعنا وأطعنا، بس في مشكلة… إحنا ما عندناش حد بيعرف يعدد زي ما الإسلام قال. مفيش، مفيش يا حبيبي، والنتيجة إن الولاد بيطلعوا مرضى نفسيين".
"جيل مريض بسبب أوهام الكبار"
اختتمت بسمة وهبة حديثها بانتقاد حاد لظاهرة الخداع المتبادل في العلاقات، مؤكدة أن كثيرًا من الرجال يعيشون في أوهام صنعوها لأنفسهم، ثم يصدقونها ويبررون بها خياناتهم.
وقالت:"أنت نفسك مريض وعايز تتعالج من الكدبة اللي صدقتها، وبتروح تقولها لست تانية بتخدعها زي ما بتخدع مراتك وولادك… في الآخر، بتخدع اتنين وبتخدع جيل كامل".