أسما إبراهيم: "عمري ما كرهت إني ست.. وبحط قوانين تبعدني عن وجع الدماغ"

تحدثت الإعلامية أسما إبراهيم عن حبها لكونها امرأة، ورأيها في حقوق المرأة داخل المجتمع.
وخلال السطور التالية ينقل لكم موقع "وشوشة" تصريحات الإعلامية أسما إبراهيم خلال استضافتها في بودكاست "دوبامين" المذاع عبر قناة الحياة و يقدمه الإعلامي حسام المراغي 

أكدت الإعلامية أسما إبراهيم أنها لم يسبق لها أن كرهت كونها امرأة مهما كانت الظروف.
وقالت: "عمري ما كرهت إني ست، ولا هكره إني ست لأي سبب... أنا بشوف إننا واخدين حقوقنا من المجتمع، وعمري ما أكره أنوثتي، بالعكس بحبها جدًا."

أنوثتها بين القوة والعقبات في بداية مشوارها الإعلامي

وأضافت: "في بداية شغلي، أنوثتي كانت ممكن عقبة شوية، مثلًا كانوا يقولوا بتدلع شوية... لكن عكس ما توقعوا، أنا كنت بجاهد جدًا، وممكن أقعد يومين بصور حلقات في البرنامج، وده مكانش متوقّع مني خالص، لكن في أي حاجة تانية، لا، عمرها ما كانت عقبة."

أصدقاؤها الأقرب ودوائر الثقة في حياتها

وأشارت الإعلامية أسما إبراهيم إلى أن أقرب الأشخاص إلى قلبها هم شقيقها حاتم وصديقها إيهاب العدلي، مؤكدة أنهما أقرب أصدقائها.
وقالت: "أحيانًا ممكن يكون ربنا بيدي الأشخاص نِعم، وبيكون عندهم صداقات مع ستات ممكن الناس تستكترها، ومن هنا بيجي الغيرة... أنا مصاحبة ناس كتير، لكن أقرب ناس ليا هما حاتم أخويا، وإيهاب العدلي. غيرهم كلهم صحاب ومعارف وأصدقاء، وكلهم ناس كويسين جدًا، بس أنا مش بحب أقرب مجال المعرفة علشان منخسرش بعض."

عن الغيرة وتجاربها مع الناس

وأضافت أنها واجهت أكثر من مرة الغيرة من بعض الأشخاص، لدرجة أن أحدهم قال لها: "إنتي ربنا مديكي كل حاجة وأنا لأ."
وقالت: "علشان كده مش عايزة أستحمل ده تاني... ووقت ما جت واحدة قالتلي كده، قولتلها: إنتي كده بتسألي ربنا! دي حاجة ربنا اللي بيكتبها، ووقتها اتصدمت، بس مش عايزة أكرر التجارب دي تاني، حبيت إن وقتي يكون لأهلي وبيتي وشغلي وولادي، مش بحب الدوشة، ولا اللمة الكدابة، ومش بحب طاقتي تروح على الفاضي."
وأضافت:"بفضل أدي كل حاجة حقها، علشان كده بوفر طاقتي ووقتي للحاجات اللي تخليني سعيدة، وللناس اللي تستحق وهتفضل جنبي."

قوانينها الخاصة لحياة أكثر راحة وهدوءًا

واختتمت الإعلامية أسما إبراهيم حديثها قائلة: "كمان في حاجة الناس متعرفهاش عني، إني شخصية بتنام بدري، ولو جوزي في البيت أنا قاعدة في البيت بردو، بحط حدود وقوانين لنفسي تريحني وتبعدني عن التوتر ووجع الدماغ، وده ملهوش علاقة بالغرور، أنا بس مش بسيب مساحة فاضية في حياتي، أنا مثلًا لو متضايقة في وقت معين، مش هخرج مع صحابي لا... هقعد مع نفسي في البيت، وأعمل حاجة بحبها."