ياسر فرج: كنت لوحدي بعد وفاة مراتي ومفيش حد سأل عليا من الوسط الفني

كشف الفنان ياسر فرج عن أسباب ابتعاده عن الفن لفترة، وخلال السطور التالية ينقل لكم "وشوشة" تصريحاته خلال استضافته في برنامج "واحد من الناس" المذاع عبر شاشة "الحياة" الذي يقدمه الإعلامي الكبير عمرو الليثي.

أكد الفنان ياسر فرج أنه أثناء فترة ابتعاده عن الفن لم يتواصل معه أحد من زملائه الفنانين، مشددًا على أن هذا الأمر كان صدمة كبيرة بالنسبة له.

وقال: "دي كانت صدمتي بجد.. أنا عيشت حياتي مع صحاب وناس قريبين جدًا مني، وكنت متصوّر إن علاقتنا دي أبدية تحت أي ظرف؛ سواء كنت شغّال أو لا، أو تعبان أو بصحتي… لكن للأسف اتصدمت، مفيش حد خالص خالص بمعنى الكلمة كان بيتواصل معايا أو بيسأل… محدش حتى كان بيشوفني محتاج حاجة، بس الحمد لله أنا مكنتش محتاج أي حاجة من أي حد".

وأضاف: "لكن حتى السؤال في حد ذاته كنت هعتبره حاجة كبيرة جدًا، لكن للأسف محصلش خالص… محدش من زملائي سأل عليّا خالص".

رفضه الزواج بعد وفاة زوجته

وأشار الفنان ياسر فرج إلى أنه رفض الزواج مرة أخرى بعد وفاة زوجته الأولى إثر إصابتها بالسرطان.

وقال:"الحقيقة بعد الوفاة بتقريبًا خمس أو ست شهور، كل اللي حواليا وقريبين مني كعائلة وأصدقاء نصحوني إني أتجوز… لأنهم كانوا بيشفقوا عليّا وعلى أولادي من الظرف، بس أنا كنت خايف جدًا".

واستكمل: "خفت أولادي ميتقبلوش الوضع، وخوفت العلاقة بينهم متكونش كويسة أو مُرضية… خفت على تقبّل أولادي للوضع خصوصًا وقت ما أكون أنا في شغلي… حسيت إني لو اتجوزت هدخل نفسي في تعب أكبر من اللي أنا فيه وهفتح مشاكل تانية… وقررت إني مش هتجوز دلوقتي خالص لحد ما ولادي يعتمدوا على نفسهم، ولو ربنا أكرم ولقيت حد مناسب فده أكيد الخير، لكن وقتها لحسن الحظ اتقابلت بإنسانة في ظرف شغل، وهي قابلت أولادي وحبّوا بعض جدًا من قبل ما يحصل بينّا أي كلام… ومع الوقت أولادي حبوها وهي حبتهم، وحسيت إن ده ممكن يكون عوضهم… طبعًا الأم مهمة جدًا في حياة البنات حتى أكتر من الأب، ودي كانت نقطة مهمة عندي".

زواج لم يكتمل من أجل الأبناء

وأضاف قائلًا: "وقتها نويت إننا نتجوز، لكن بعدها حصل شوية مواقف خلتني أراجع نفسي، وبمجرد ما تراجعت عن الفكرة أولادي زعلوا جدًا وطلبوا مني إني أتجوزها، وقتها قلت: تمام طالما هما شايفين كده تمام… واتجوزنا، ولكن مكنش لينا نصيب نكمل لأن الأمور مكنتش أحسن حاجة.. وحسيت إن مش كل أولادي مستريحين، وقدّر ربنا إننا ننفصل"، واختتم الفنان ياسر فرج حديثه مؤكدًا: "أهم ما أفكر به دائمًا هو راحة وسعادة أولادي".