لقاء سويدان عن شخصيتها في "أيام": "الدور دة تحدي حقيقي"
أعربت الفنانة لقاء سويدان عن سعادتها بالمشاركة في الجزء الثالث من مسلسل "أيام"، مؤكدة أن الدور الذي تقدمه هذا العام يختلف تمامًا عن كل الشخصيات التي جسدتها من قبل، سواء من حيث المظهر الخارجي أو التفاصيل الداخلية للشخصية.
وقالت لقاء في تصريح لـ"وشوشة": ”الدور كان جديد عليا خالص في اللبس والشكل وكل حاجة، حتى التفاصيل الشخصية كانت مختلفة جدًا، وده اللي شدني للمشاركة في الجزء الجديد من المسلسل".
كواليس لطيفة وروح أسرية بين فريق العمل
تحدثت لقاء سويدان عن أجواء كواليس التصوير، مشيرة إلى أن التعاون بين فريق العمل كان مميزًا للغاية، وأن روح الود والاحترافية سادت بينهم طوال فترة التصوير.
وقالت: “الكواليس كانت لطيفة جدًا، والجروب كله ناس محترمة أوي زي الأستاذ رياض الخولي، حورية فرغلي، شيري عادل، حجاج عبد العظيم، كلهم ناس محترفين جدًا ولطاف في التعامل".
وأضافت أن تصوير المسلسل خارج مصر ساهم في زيادة الترابط بين فريق العمل، قائلة: “كنا برا مصر، ومتقسمين على أوتيل واحد، فكان طبيعي نشوف بعض الصبح وبالليل، حتى لو مفيش مشاهد تجمعنا، بنقعد سوا على الغدا أو العشا، الشغل برا مصر ليه ميزة جميلة جدًا، إن كل الناس بتاكل مع بعض وبتقضي وقت لطيف، فده بيخلق جو حلو جدًا بين الفريق".
شخصية مختلفة ومعايير جديدة في الاختيار
وعن المعايير التي تعتمدها في اختيار أدوارها، أكدت لقاء أنها تحرص دائمًا على تقديم ما هو جديد ومختلف، قائلة: “المعايير اللي باختار الدور على أساسها إن لازم أقدم حاجة جديدة، مكررش نفسي، وأبرز فيها موهبتي والتمثيل اللي جوايا، بحب أختار دور يكون مختلف لأنه بالنسبة لي تحدي".
وأضافت موضحة طبيعة شخصيتها في مسلسل “أيام”: “الشخصية اللي بقدمها كانت مختلفة جدًا، بتلبس لبس بسيط جدًا، جلابياتها قليلة، ومبتحطش ميك أب تقريبًا إحنا كممثلين بنستخدم ميك أب بسيط جدًا عشان الإضاءة، ومفيش مناكير ولا أي مظاهر تجميل، وده كان جديد عليا تمامًا وممتع في نفس الوقت".
واختتمت لقاء حديثها بالتعبير عن فخرها بالمشاركة في هذا العمل الجماعي، الذي وصفته بأنه من التجارب القريبة إلى قلبها بسبب ما جمع فريقه من حب وتفاهم سواء أمام الكاميرا أو خلفها.