مصطفى حدوتة: "لما حد يكسر أرقامي ممكن وقتها أفكر أرجع أنافس"
تحدث الشاعر مصطفى حدوتة عن مشواره الفني ورؤيته الخاصة للإبداع، مؤكدًا أنه يسعى دائمًا لتقديم أعمال حقيقية وصادقة، بعيدًا عن الاستسهال أو مجرد التكرار.
وكشف مصطفى حدوتة عن أعماله وأسرارها، خلال ندوة خاصة لتكريمه من قبل مجموعة "وشوشة" الإعلامية، بحضور الكاتب الصحفي مصطفى متولي، رئيس التحرير، والزميلة منار بدر الدين، رئيس قسم الفن.
قال مصطفى حدوتة: “طالما تعرف تعمل حاجة، متوقفش عن عملها، أنا مثلًا لو بعرف أفصّل بنطلون كويس، أفضل أعمله، ولو قدرت أضيف عليه لمسة جديدة، يبقى تمام، حتى لو الحاجة بسيطة، وتفضل مكملة معايا، لكن مش بالضرورة أحب أنافس في كل المجالات، لأن أحيانًا الواحد بيحس إنه اكتفى من المنافسة، ولما حد يقدر يكسر أرقامي، ممكن وقتها أفكر أرجع أنافس من جديد”.
وأشار إلى أن الإصرار على الاستمرارية هو سر النجاح، حتى في أدق التفاصيل.
مصطفى حدوتة: أحب الراب وأتمنى التعاون مع أي فنان في مجاله
وأضاف مصطفى حدوتة أنه من عشاق موسيقى الراب منذ زمن طويل، قائلا: “كل الفنانين اللي بيغنوا راب بيجولي من غير استثناء، وأنا بحب اللون ده من زمان جدًا وبسمع راب كتير، وبحب جدًا أشتغل فيه مع أي حد من اللي بيقدموه”.
وأكد أن هذا اللون الموسيقي له تأثير كبير على وجدانه وإبداعه، ويمنحه مساحة مختلفة للتعبير عن نفسه.
مصطفى حدوتة: الفرح الحقيقي أن أكتب كلمات صادقة
وأكد مصطفى حدوتة أن ما يسعده حقًا ليس مجرد الانتشار، بل كتابة كلمات صادقة وتجربة فنية أصيلة، قائلا: “بالنسبة لي، الفرحة الحقيقية بتيجي لما أكتب حاجة نابعة من قلبي، كلمتين صادقين محدش كتب بيهم قبلي، لما أكتب حاجة خاصة بيا وبأسلوبي، ده أكتر شيء بيفرحني، مش فارق بقى هتتغنّى إزاي، أو على أي لحن، أو في أي قالب موسيقي، المهم إنها تكون مناسبة وصادقة”.
مصطفى حدوتة: أحمد سعد فنان خفيف الدم والعمل معه ممتع
وعن تعاونه مع المطرب أحمد سعد، أوضح مصطفى حدوتة أن التجربة معه مليئة بالمتعة رغم صعوبتها، قائلا: “الشغل مع أحمد سعد صعب جدًا، لكنه في نفس الوقت ممتع بخفة دمه، هو شخص دمه خفيف وطول الوقت بيهزر، وده بيخلي الكواليس تمر بسرعة حتى لو قعدنا ساعات طويلة، ممكن نشتغل مع بعض 10 ساعات من غير ما نحس بملل، والنتيجة في الآخر بتطلع حلوة طول ما إحنا شغالين بنفس الروح”.
وأشار إلى أن الأجواء الإيجابية التي يخلقها سعد تجعل العمل أكثر سلاسة وإنتاجية.