سلوى عثمان: مش وزني اللي حرمني من أدوار البطولة!
كشفت الفنانة سلوى عثمان عن رأيها في عدم حصولها على أدوار البطولة خلال مشوارها الفني، نافية أن يكون وزنها هو السبب الرئيسي وراء ذلك.
وقالت سلوى عثمان خلال لقاء لها في برنامج "نص الكلام" المذاع على قناة النهار: "وأنا صغيرة، وفي الوقت اللي كان ممكن آخد فيه بطولات، مكنتش تخينة زي ما الناس فاكرة. في فيلم ملف في الآداب كنت ماشية في وسط البلد مع مديحة كامل، وشكلي كان عادي، وكمان في فيلم بلاغ ضد امرأة مع الفنانة بوسي، لو شوفتوني فيه مش هتقولوا إني واحدة تخينة، كنت جسمي كويس".
وأضافت: "مرة وأنا صغيرة عملت دايت وخسيت 12 كيلو، وقعدت 3 شهور باكل بس بيض مسلوق، ووصلت لـ54 كيلو. ومع ذلك، الناس مكانش عاجبهم حاجة. فبطلت أمشي على مزاج الناس، شوية أخس وشوية أتخن، والناس دايمًا بتتلكك".
وتابعت: "بشوف نجمات كبار كانوا في عز نجوميتهم، وكانوا مليانين، ومع ذلك بياخدوا بطولات، فالموضوع مش وزن خالص".
واختتمت حديثها قائلة: "واحد من الأسباب الحقيقية إن الشهرة معاندتني إني مكنتش اجتماعية قوي، ومكنش عندي شلة في الوسط، وده كان فارق كبير، لما كان بيجيلي دور، كنت بروح أشتغله كويس، لكن أدوار البطولة مكنتش من نصيبي".