عمرو أديب عن الهضبة: عمرو دياب بيعدي في الباب بصحة مش طبيعية!"

أعرب الإعلامي عمرو أديب عن إعجابه الشديد بألبوم عمرو دياب الجديد، مؤكدًا أن "الهضبة" لا يزال متربعًا على عرش الغناء رغم مرور أكثر من أربعين عامًا على بداياته، وقال أديب: "من كام يوم نزل ألبوم عمرو دياب، كل الناس كانت مستنياه، وأنا قولت يلا نسمع.. سمعت الأغنية الأولى والتانية، وفجأة لقيت نفسي بدندن وأقول: خطفوني خطفوني.. رايح جاي في البيت بغنيها!".

وأضاف أديب خلال برنامجه  " الحكاية " المذاع عبر قناة MBC مصر 2: "عمرو دياب بيتسلل إلى وجدانك من غير ما تحس.. بيستحوذ عليك، وتلاقي نفسك جوه الحالة بتاعته، عايز تسمعه، وعايز تفضل معاه. أغنية زي ''خطفوني'' مع الصيف كده، بقت حالة.. حالة اسمها عمرو دياب". وأكد أن الألبوم "عابر للوجدان"، وأنه مش مجرد شغل موسيقى، لكنه "فخ فني تاريخي بكل المقاييس".

وأكد الإعلامي أن الهضبة يمتلك ما يشبه السر في الوصول للناس، وقال: "هو في حاجة مش مفهومة.. شيء ربنا مديهوله، يخليه يدخل جوا وجدانك وزهنك بكل بساطة". وأوضح أن عمرو دياب يثبت كل مرة إنه مش بس نجم بيغني، لكنه ظاهرة عالمية، وفنان بيفهم في المزيكا بشكل عميق ومتجدد.

واختتم قائلًا: "الراجل ده بيغني بقاله أربعين سنة، والصح إنه يعدي من الباب كده عادي؟! صحته غير طبيعية، وطالع لابس ساعة حلوة أوي.. شكله وطريقته وحتى تفاصيله عاملين حالة.. مبروك يا هضبة، الألبوم حالة، وإنت مش شبه حد".