في ذكرى رحيل حسن حسني.. حمادة هلال لـ"وشوشة": كنت بنسى التمثيل وأنا ببص عليه

عبر الفنان حمادة هلال في الذكرى الخامسة لرحيل الفنان الكبير حسن حسني، عن مشاعره وذكرياته الخاصة مع الفنان الراحل، مؤكداً أن العمل معه كان واحدا من أحلامه التي تحققت، خاصة خلال مشاركتهما في فيلم "عيال حبيبة".

وقال حمادة هلال، في تصريح خاص لـ"وشوشة" عن أول يوم تصوير جمعه بحسن حسني: "الله يرحمه عم حسن ويحسن إليه، طبعاً فاكر أول يوم جمعني بيه في الشغل، لأنه كان يوم مستنيه من زمان كنت دايماً بحلم أمثل قدامه وكان نفسي يعمل دور أبويا في أي عمل، ولما اليوم ده جه، كنت مركز معه أكتر من التمثيل نفسه، كنت ببص عليه طول الوقت وانبهر بحضوره".

وتحدث حمادة هلال عن أجواء كواليس الفيلم، قائلاً: "التصوير كان كله ضحك، لأن المخرج مجدي الهواري جمع كل الناس الحلوة محمد لطفي، رامز جلال، غادة عادل.. كانت تركيبة كلها طاقة حلوة، وده انعكس على جو الشغل".

وعن نظرته للفنان الراحل، قال حمادة هلال: "أنا من أكبر معجبي حسن حسني، كنت شايفه في كل حاجة أب، عم، خال، أخ كبير.. كان عنده كاريزما ربانية تخليك تركز معاه وتتعلم وأنا بمثل معاه، كنت بنسى الدور وأتابع أداءه كأني بتفرج على حلم بيتحقق".

وأشار حمادة هلال إلى مشهد لا يزال محفوراً في ذاكرته من فيلم "عيال حبيبة": "المشهد اللي بنتكلم فيه عن 500 جنيه للحلاقة، وهو فجأة طلع 100 جنيه وقطعها، ده مشهد علم مع الناس ولسه فاكرو لحد النهاردة".

وحول سبب حب الجمهور لحسن حسني من مختلف الأجيال، قال: "حسن حسني كان فنان عبقري جمع خبرة سنين طويلة، وقدمها بخفة دم نادرة قدر يعمل فرق كبير في المرحلة العمرية اللي عادة الفنان بيقدم فيها دور الأب، وخلانا نحب كل شخصية عملها، سواء كانت لشخص غني أو بسيط، طيب أو حتى شرير".

واختتم حمادة هلال حديثه بكلمات مؤثرة عن روح العطاء لدى الفنان الراحل: "كان دايماً شايل هم الكوميديان اللي حواليه، وبيحاول يرفع أي حد معاه في المشهد.. كان كريم فنياً وإنسانياً، ربنا يرحمه ويصبر كل اللي بيحبوه".