منتج "أشغال شقة جدا": أخيرا رجعنا لزمن التكتلات الفنية

أشاد المنتج عبدالله أبو الفتوح بعودة الاعمال الجماعية في الدراما والسينما من خلال منشورا عبر حسابه الشخصي على موقع "فيسبوك".

كتب معلقا: "رجعنا تاني لزمن التكتلات الفنية في الأعمال الدرامية، مفيش حاجة اسمها نجم واحد يشيل الليلة، منه لله اللي كان السبب في الموضوع ده وخلي كل واحد يشوف نفسه أنه كفاية قوي علي الحدوتة وحرم الجمهور من ثنائيات أو ثلاثيات ورباعيات كمان كانت ممكن تبقي مباريات تمثيلية تثري التاريخ الفني السينمائي والدرامي خلال الخمسة وعشرين سنة اللي فاتوا.

أضاف: “اتحرمنا من تجمعات فنية كانت ممكن تمتعنا بسبب وسوسة الشياطين أو النفس البشرية في ودن النجوم، لا انت تشيل لوحدك وبتجيب إيرادات والخليج بيحبك، انت مش محتاج حد جنبك يشاركك النجاح، إلا فيما نُدر يعني ورحم ربي، و طبعاً كان فيه عذر جاهز ومُعلب ودائماً يتقال وهو أن الميزانية متشيلش نجمين كبار”.

تابع قائلا: “طب وإيه اللي خلاها دلوقتي ممكن تشيل؟ ده كان فيه أفلام في الخمسينات والستينات والسبعينات والتمانينات فيها نجوم الأفيش مش قادر يشيلهم من حلاوتهم وقوتهم وتقلهم، كذلك مسلسلات التمانينات والتسعينات تعج بنجوم الصف الأول جنب بعض من غير نفسنة ولا مكايدة ولا حسابات حجم الدور بالمتر، ومين قبل مين في التتر”.