تامر حسني يوجه رسالة دعم لـ محمد سامي: لا تدع الإحباط يؤثر عليك.. أنت أنجح مخرج
وجه الفنان تامر حسني رسالة دعم قوية للمخرج محمد سامي بعد إعلانه اعتزال الإخراج التلفزيوني، مؤكدًا أنه لا يجب أن يسمح لأي إحباط بالتأثير على مسيرته الناجحة.
وعلق تامر حسني برسالة عبر منشور المخرج محمد سامي على "الفيس بوك" قائلًا: “أوعى تكون عايز تبعد عشان أي إحباط.. جايز يكون في بعض المشاهد اللي الناس انتقدتها، وأنا شخصيًا استغربتها شوية وقلت جوايا إنك مش محتاج تعملها أصلًا لأن عندك الحقيقي والأهم، بس على رأيك الفنون جنون.. أحيانًا فكرة مجنونة تنال الإعجاب وأحيانًا لا، لكن ده ميخليناش ننسى إنها مجرد بعض مشاهد، مش بعض أعمال".
وأضاف حسني متحدثًا عن نجاحات سامي: “أنت بالفعل المخرج الوحيد في تاريخ مصر اللي مفشلش ولا مرة، ويمكن الحظ محالفكش أوي في عمل أو اثنين على مدار 14 سنة، لكن الجمهور مينفعش ينسى إنك قدمت "آدم" اللي جمع كل المصريين والعالم العربي زي ماتشات الكورة، لأنه ناقش قضية تهم الجميع، وبعدها "سبق الإصرار" و"حكاية حياة" اللي كانوا نقلة كبيرة في ديكورات الدراما المصرية، ثم "الأسطورة" و"البرنس" و"جعفر العمدة" اللي حققوا نجاحات ساحقة وكانوا أعلى نسبة مشاهدة، وبعدهم "نعمة الأفوكاتو" و"إش إش" و"سيد الناس" اللي حققوا نجاحات كبيرة برضو".
وأكد تامر حسني على أهمية عدم السماح بالإحباط بالتأثير على سامي، قائلًا: “هزعل منك لو هتمشي محبط وأنت أنجح حد.. الشجرة الخضراء الجميلة ساعات بيطلع لها ورق أصفر بسيط، عادي بيتقص وبتفضل شجرة كبيرة وجميلة، وده التطوير الطبيعي لأي بني آدم ناجح، أنت محمد سامي اللي اكتشفته وقدّمته للصناعة وهو عنده 27 سنة، مستحيل تهتز، ممكن تزعل يومين وتراجع نفسك، لكن في النهاية أنا واثق إن قرار سفرك ودراستك لحاجة جديدة هتكون نقلة كبيرة في مشوارك".
واختتم رسالته قائلًا: “أوعى تخلي الزعل من بعض المشاهد ينسيك أنت قدمت إيه للدراما.. نفتكر هو أمتعنا سنين قد إيه، وذكرت كل أعمالك عشان لو حد ناسي أفكره، وعشان لو أنت محبط، تجمد تاني.. ربنا ينور طريقك، وتبقى أقوى وأقوى من أي وقت، وأنا في ضهرك طول العمر يا بطل".
وجاءت رسالة تامر حسني كدعم قوي لمحمد سامي بعد قراره المفاجئ، حيث أكد من خلالها على النجاحات الكبيرة التي حققها سامي خلال مسيرته، مشددًا على أن النقد جزء من رحلة أي فنان ناجح.
