أدهم سليمان لـ"وشوشة": "100 سؤال" بتعبّر عن قلق الشباب من المستقبل المجهول

طرح الفنان أدهم سليمان، أغنية جديدة بعنوان "100 سؤال"، وذلك عبر قناته الرسمية على موقع الفيديوهات العالمي "يوتيوب" وجميع المنصات الرقمية.

كشف أدهم سليمان في تصريح خاص لـ "وشوشة"، كواليس الأغنية، وقال إنه استوحى فكرتها من الناس، مشيرًا إلى أنهم يعانون من ضغوطات الحياة في الفترة الحالية، وتسيطر عليهم مشاعر من القلق والخوف والتردد تجاه المستقبل.

أضاف سليمان: "أنا حسيت إني زي الناس، محتاج أعبر عن اللي هما حاسين بيه، فأنا شايفهم بيمروا بحيرة شديدة، وحسيت إن واجبي أنزل حاجة تعبر عنهم، خصوصا الشباب الصغير اللي مستقبلهم لسة في علم الغيب ربنا يكون في عونهم".

وعن الصعوبات التي واجهته أثناء التحضير للأغنية، أوضح أنها تكمن في تحديد فكرة الأغنية، مشيرًا إلى أن أصعب مرحلة هى مرحلة الفكرة، وكذلك كلمات الأغنية.

واستطرد حديثه: "الأغنية مش دايمًا بتيجي باكيدج، لا دي من عند الله وفي أوقات بتقعد تفكر في كل حاجة، وتاخد وقتها الكافي عشان تكون طالعة صادقة وفي نفس الوقت جديدة على الودن متسمعتش قبل كدة بشكل أو بآخر".

وعن الرسالة التي أراد أدهم سليمان توصيلها للجمهور من خلال أغنية "100 سؤال"، قال: "عاوز أقول إن ربنا كريم، والإنسان المفروض ميسلمش نفسه للتفكير والأسئلة والحيرة، كلنا بعد مشيئة ربنا بنعمل اللي علينا وربنا بيوفقنا، أتمنى من كل قلبي الناس متفكرش زيادة عن اللزوم ومتحطش نفسها في حيرة وضغط وربنا يكرمنا جميعا".