السر في السعي.. تامر حسني يدعم الموهوبين
حقق المطرب تامر حسني أمنية مجموعة من المعجبين به وذلك خلال مشاركته لفيديو بصحبتهم في حفلته ونشر الفيديو عبر حسابه الرسمي على موقع إنستجرام وعلق على الفيديو قائلاً : "رسالة صغيرة للمحبطين في أي مجال من خلال الفيديو الجميل دة لشباب حسوا إنهم حققوا ولو جزء صغير من أحلامهم هقول كلمتين وواثق إنهم رايحين لناس كتير مستنية تسمعهم".
وتابع حديثه قائلاً:" أولاً بجد أنا فخور إني قدمت الاصوات العظيمة دي فعلاً ياشباب إنتوا أصوات ومواهب مش عادية ومن أجمل الأصوات المصرية عارف إن الزمن دة بقى يبرز ويهتم بأنواع تانية أكتر وعارف إن اللي عندهم موهبة محترمة وحقيقية زيكم كدة بيبقوا زعلانين وبيحسوا إنه مش زمانهم عشان كدة بقي موضوعكم شاغلني وواخد حيز كبير من حياتي".
وأستكمل حديثه قائلاً:" بشكل عام إحباط الشاطرين الفاهمين اللي يستحقوا الدعم في أي مجال هو إحساس صعب ويقهر قلب أي حد وخصوصا لما يشوفوا ميزان الحياة بيتغير وإن الناس ممكن تسقف وتحتفل وتمجد في إنسان تافه أو مزنوق بواسطة وفاشل بس مجبرين يسقفوله واللي يستحقوا التمجيد في أي مجال مش واخدين حقهم وبيدفنوه بالحياة".
وأردف: "عشان كدة إحساسي تجاه الموهوبين هو إحساس أخوي بحت غصب عني والله والله بحس إني عايز أفرحهم ويمكن في الحفلات بعض الناس مش بتبقى مرحبة أوي بالأصوات الجديدة وعايزين يستمتعوا بالنجم اللي جايين عشانه بس وده تعليق وصلي كتير فأنا هحاول الفترة الجاية إني أدعم الموهوبين بكذا شكل تاني حتى لو بسيط ولو عالمسرح هيبقى فقرة واحدة فقط".
وتابع حديثه قائلاً:" جايز تفرق في حياتهم وتخليهم لما ربنا يكرمهم وينجحوا يكونوا حابين الخير لغيرهم ويقدموا ناس بعدهم يستحقوا".
وأختتم حديثه قائلاً:" ياموهوبين يامجتهدين ياشطار في أي مجال وأي شغلانة إفتكروا دي كويس لو الزمن دة ليه ناس ماسكة الدفة وبتحولها إتجاه التافهة!! في بقى رب العدل ربنا اللي معاه الدفه الأعظم اللي مهما عدى من وقت هيرجع كل شئ لصوابه يعني لا يصح إلا الصحيح والتافه يومين ومش هيبقى موجود، بس الحقيقي منكم هو اللي هيستمر متقلقوش دوركم الجميل جاي إطمنوا بس أوعوا تبطلوا سعي أوعوا تبطلوا سعي، أوعوا تبطلوا سعي السر في السعي المستمر".
وفي سياق آخر أحيا تامر حسني حفلا غنائيا ضخم في الأسكندرية والذي اضطر لاختصاره بسبب كثافة العدد وشارك صور من الحفل توضح التزاحم الموجود في الحفل.
وعلق على الصور قائلاً: "زيارتي للإسكندرية حدث عظيم بالنسبالي بستناه كل سنة أو سنتين وخصوصاً إنه يوم تكريم للطلاب الجدد، وده يوم غرضه التشجيع العلمي لطلاب مصر، وليست حفلة من باب الاحتفال بلا هدف".
وتابع : "تشرفت بوجودي وسط أهلي حبايب قلبي الجمهور السكندري العظيم، وعارف إن العدد كان فوق التوقعات بكتير، وبالفعل كان في تدافع من بعض الناس، وواثق إنه غير مقصود.. بس يمكن عشان الحفلة دي تخطت التوقعات في حجم الحضور، وخصوصاً الإقبال ساعة الحفلة كان مفاجئ للجميع".
وبرر سبب إختصاره للحفل قائلاً:" غنيت ساعة ونص حرصاً على سلامتكم.."، وختم تعليقه بالمباركة لـ "جيل الثانوية العامة"، وتوجه بالشكر لكل من تعبوا معه في هذا اليوم بحسب تعبيره، والتحية لجمهور الإسكندرية.