مروة صبري لـ"وشوشة": مبسوطة بتكريمي في مهرجان الفضائيات وعبير صبري أختي بس ملهاش دعوة بشغلى
أعربت الإعلامية مروة صبري عن سعادتها بالتكريم، في مهرجان الفضائيات العربية، إذ تم تكريمها بجائزة أفضل مذيعة للعام الحالي، مؤكدة أن التكريم جاء بعد تعب ومجهود.
وقالت في تصريح خاص لـ"وشوشة": مبسوطة بتكريمي جدا من مهرجان الفضائيات العربية كأفضل مذيعة، وتكريمي دة جه بعد مجهود وتعب وهو بيعبر عن نجاحي.
وأضافت: أنا عاوزة أوضح حاجة بمناسبة تكريمي، أنا وعبير صحيح إخوات وكل حاجة لكن منفصلين تماما في الشغل، وهي ملهاش علاقة بشغلي خالص.
وسبق وانتقدت مروة صبري، تصريحات الفنانة مها أحمد التي أثارت بسببها جدلًا كبيرًا خلال الساعات القليلة الماضية بسبب تواجدها بشكل مستمر على تطبيق "تيك توك" وانتقادها من قبل جمهورها.
وقالت مروة، ببرنامجها "قعدة ستات": "افصلوا النت يا جماعة عن مها أحمد، لأن مها مبقتش خطر على نفسها دي بقت خطر على الجمهور كمان، ومش دول الجمهور اللي انتي بتحبيهم ومش قبل كده لما الناس طلعت تهاجمك وتقولك بتطلعي ليه على التيك توك قولتي محدش يتكلم، طب انتي طالعة على متابعينك بتهزقيهم ليه؟".
وأضافت مروة صبري: "سيبي اللي عايز حاجة يقولها، ودي أذواق، وفي ناس مبسوطة بوجودك على اللايف من وجهة نظرهم يعني هم أحرار وفي ناس متضايقة وناس شايفة انك قيمة فنية كبيرة.
واختتمت حديثها: وحتى لو هتردي عليهم قولي لهم يا جماعة انا مش لاقية شغل إنما لا تتلفظي بألفاظ".
