الإعلامية مروة صبري تدعم الفتيات: ارقصوا في حفل تخرجكم مش عيب

وجهت الإعلامية مروة صبري، رسالة شديدة اللهجة لمستخدمي مواقع التواصل الاجتماعي، الذين يهاجمون الفتيات اللاتي يحتفلن بتخرجهن بالرقص.

وقالت صبري خلال تقديمها برنامج "قعدة ستات": أي بنت بتتخرج من الجامعة ارقصي وعبري عن فرحتك بالرقص، ارقصي ومتعتذريش، ومتبصيش لأشخاص سلبية.

وأضافت: الله أعلم بالأشخاص دي هل هما ناس كارهين الفرحة، ولا لجان إلكترونية، افرحي بطريقتك كفاية بقى، قاعدين نهدم في بعض.

وكانت صبري قد دافعت البلوجر هدير عبدالرازق سابقا، بعد أزمة تداول فيديو فاضح لها تبين بعد ذلك أنه مع زوجها وقالت: "قمة الحقارة اللي في الدنيا إن في ناس حقيرة معندهاش ولا دم ولا أخلاق، وللأسف ثلاثة أرباعهم رجالة، بيقولوا للناس ابعت 100 جنيه أو 50 جنيه ونبعت لك فيديوهات هدير عبد الرازق".

وأضافت: "هدير طلعت لايف من يومين وكانت منهارة وبتصرخ، وطلعت قسيمة طلاق بينها وبين الشخص اللي كان معاها في الفيديو، يعني الشخص ده كان جوزها ومكانتش بتعمل حاجة حرام، الفيديو ده اتسرب إزاي؟ في حد عايز يؤذيها أو يقتلها أو يدفنها بالحياة، وليه الفيديو اتصور في الأساس؟".

وتابعت: "ارحموا هدير عبد الرازق، اعمل حساب إن عندك أم أو أخت أو ست متجوزها أو قرايب بنات، واستر علشان ربنا يسترك، البنت النهاردة كانت هترمي نفسها من فوق برج القاهرة، وحاولت تقطع شرايين إيديها وعايزة تخلص من الدنيا".

يذكر أن البلوجر هدير عبد الرازق تصدرت منصات التواصل بعد تسريب فيديو فاضح لها ظهرت فيه في وضع مخل بالآداب، وقامت الأجهزة الأمنية بفحص الفيديو للتأكد من الموجودين فيه ومكان وتوقيت تصويره، فيما خرجت لتدافع عن نفسها مؤكدة أن الشخص الذي يرافقها بالفيديو هو زوجها.