هنا الزاهد: أدهم كان أول حب فى حياتى وقت الجامعة وأمي ضربتني قلم جامد بسببه

قالت الفنانة هنا الزاهد:"أنا كنت شاطرة طول عمري في المدرسة بس في آخر سنتين لما زهقت من المذاكرة قررت أقعد مع زمايلي الفاشلين اللي ورا خالص اللي هما مش بتوع مذاكرة ولا في دماغهم دراسة وقتها اترفدت وأنا في آخر سنة لمدة أسبوع واتعمل ليا استدعاء ولي أمر".

وأضافت الزاهد خلال لقائها ببرنامج "صاحبة السعادة" الذي تقدمه الفنانة إسعاد يونس بقناة "dmc"، أمي ضربتني مرة بالقلم في الشارع، وكان قلم جامد وقت الجامعة كنت بدأت في قصة حب وحبيت واحد زميلنا وكان جميل ومؤدب وكنت مكسوفة أقول، لماما فكدبت عليها ودي كانت أول مرة أكدب عليها في حياتى".

وأكملت الزاهد حديثها قائلة:"روحت قعدت مع الشخص اللي كنت معجبة بيه في كافيه عبر وسيط اللي هي هند زميلتنا، والشخص ده خدني وصلني بالقرب من مكان أمي كانت منتظراني فيه وأمي وقتها شافتني وكانت نظرة عينيها طالع منها نار، ولما سألتنا عن القصة كدبت فضربتني بالقلم وقلت لها كنت مع أدهم يا ماما واتعرفت عليه وكنا قاعدين في كافيه طلبت رقم تليفونه وكلمته وقالت له لما تحب توصلها تجيبها لحد البيت ومن وقتها بقيت أحكي لماما عن كل حاجة، أدهم ده كان أول إعجاب وقصة حب فترة الجامعة ومكنش فيه قصص حب تانية قبله.