ياسمين عبدالعزيز: أبويا انفصل عن أمي وراح اتجوز
قالت الفنانة ياسمين عبد العزيز كنت باخد حقي وحقي اللي مني وده كان سبب قوتي في المنطقة اللي عايشة فيها في المعادي وشهرتي أنا كنت شقية جدا بس بأدب مبعملش حاجة وحشة كنت بنط من على السور في المدرسة.
وأكدت ياسمين عبد العزيز خلال لقائها ببرنامج "صاحبة السعادة" الذي تقدمه الفنانة إسعاد يونس بقناة "dmc" كنت كل أسبوع بترفد من المدرسة وأمي متعرفش بس كنت بادخل لوحدي بعد الرفد لإني كنت بعمل مصايب علشان أنا شايلة مسئولية نفسي وبصرف على نفسي فكانت عندي حتة الاستقلالية.
وتابعت أهلي مكنش عندهم عربية فكنت أشوف أهل أصحابي بيودوهم بعربية فحطيت في نفسي إني لازم أحوش فلوس وأشتري عربية وفتحت دفتر توفير في بنك قريب مننا وكل لما يجيلي فلوس وليكن 1000 جنيه وقعدت أحوش لغاية لما اشتريت أول عربية في حياتي كان سعرها بـ57 ألف جنيه وحطيتهم في شنطة المدرسة وروحت اشتريت العربية.
وواصلت أمي كانت بتتشغل وأبويا انفصل عنها وراح اتجوز فأنا قلت لها أنا بتشتغل وأجيب أكتر منك خلاص اقعدي وانا اللي هصرف علي البيت وحسيت وقتها إني أنا المسئولة خاصة لما أخويا سافر يشتغل برة.
وأختمت حديثها قائلة كنت باروح المدرسة بالعربية مع إنها كانت وراء بيتنا بس الشعور كان مسيطر علي، لما جيت أتجوز كان جوزي بيجي يديني مصروف كنت بارفض لإني اتعودت ادي مش اخد وعندي استقلالية وبقيت انا اللي مسئولة من صغري.