نبيلة عبيد تبكى على الهواء بسبب يوسف شعبان: كان حاجة كبيرة بالنسبة لى
الثلاثاء 02/مارس/2021 - 11:55 ص
أميرة عبد الهادى
قالت الفنانة نبيلة عبيد، إن الفنان يوسف شعبان شارك في أغلبية الأفلام التي شهدت انطلاقتها، موضحةً: "كنت ببقى سعيدة لما يقولوا إن الدور ده ميعملهوش إلا يوسف شعبان، لأنه ممثل محترم وعظيم يقدر زملائه والعمل، وكان بيقف في البلاتوه زي التلميذ عشان ياخد التعليمات".
وأضافت في مداخلة هاتفية عبر برنامج "كلمة أخيرة"، المذاع على شاشة "ON": "كان بيحط وشه في الأرض حتى آخر لحظة، وكنت سعيدة بآخر عمل مع بعض وهو فيلم كشف المستور، وقبلها قضية سميحة بدران وحارة برجوان واغتيال مدرسة، كان أكثر ممثل كنت ببقى سعيدة لما يترشح معايا في فيلم".
وتابعت: "في بدايتي، عملت معه بسوريا ولبنان وغيرهما، كان فنانا عظيما، كان صديقا وأخا لو عاوزة أخد رأيه في حاجة، وكان بالنسبة لي حاجة كبيرة جدا".
وعن آخر مرة كانا يتحدثا فيها سويا، قالت: "كنت بصور المسلسل في لبنان، وكان هو وبنته في برنامج بالكويت، والبنت كلمتني عشان أدخل في مكالمة، لكني كنت في بلاتوه، ومحصلش نصيب".
وأردفت أنها كانت تستشيره في كل أمور حياتها الشخصية وكان ينصحها بصدق: "كان حاجة عظيمة، ويديني رأيه المظبوط، ولو مش عاوز يعلق على حاجة كان بيحط عينه في الأرض، وكان يتكلم بصدق وحنان وأخ وزميل، وفي الشغل بيتعامل باحترام، وكان في كيميا بيننا، وعمره ما سمعته بيقول حاجة غلط".
