سميرة سعيد: "أنا ست متحفظة وعاملة شوية فرمانات بينى وبين نفسى"
الجمعة 19/فبراير/2021 - 01:08 م
أميرة عبد الهادى
كشفت الفنانة سميرة سعيد، جانبا من حياة عائلتها، قائلة: "أمي كانت من بيئة منفتحة من فاس، وأبويا من بيئة محافظة من الرباط، طول الوقت كانوا بيناكفوا بعض لاختلاف الثقافات بينهم، ماما دايما يتقوله أنا من عيلة (بناني) المتفتحة والمتعلمة وأهل الحضارة والعلم وناس متفتحة وانتو في الرباط بتقعدوا في البيوت مش بتخرجوا ومتحفظين طول الوقت، الحوار بيكون في طور الاحترام".
وأضافت "سعيد" خلال لقائها ببرنامج "السيرة" المذاع على شاشة قناة "dmc"، "عيلة ماما متفتحة جدا، الستات وقتها كانت متعلمة وبيبلسوا قصير، والست متخرجش إلا لما تكون لابسة كويس، ولكن أهل بابا في الرباط كانت كل حاجة بالنسبة لهم عيب وميصحش، وحتى يوم ما ابتديت أغني أحد عمامي قال إزاي بنت (بنسعيد) تبقى مغنية، وابتدوا يبقوا ضد أخوهم".
وتابعت: "أبويا كان مختلف عن باقي العيلة، ومتفتح، لأن كان عنده أصدقاء كتير في المقاومة، فالحياة فتحت له دماغه، واكتشفت فيه أنه واع ومثقف، وأنا عندي 9 سنين بدأت أبصله بصة تانية لما خلاني أغني".
واستطردت: "أنا ست متحفظة وعاملة شوية فرمانات بيني وبين نفسي، ظهر أنها كانت موروثة، فيه حاجات تصح ومتصحش وأن فيه أصول، وده أخدته من عيلة بابا، بالنسبة لعيلة أمي علموني فضول الحياة والمعرفة، والتطور مع الزمن".
