أيمن بهجت قمر يرد على اتهامات أبو الليف ويكشف الحقيقة الكاملة

رد الشاعر أيمن بهجت قمر، علي المطرب نادر أبو الليف، الذي اتهامه بالتقصير معه، وكتب "قمر"، علي صفحته الرسمية بموقع التواصل الاجتماعي "فيسبوك": "فيه موضوع متعلق من سبع سنين أنا ما اتكلمتش فيه بس واضح أن الفنان نادر أبو الليف اللي بتجمعني بيه صلة قرابه مصمم أنه يخليني اتكلم وأنا هتكلم بالأصول واحترامًا لصلة القرابه، أكتر من مرة نادر طلع بيلمح إننا قصرنا معاه أو حاجات من هذا القبيل وأخرهم على اليوم السابع الأسبوع ده وبما إنه كلام يخص العمل مش عن العلاقات الشخصية فاعتقد التوضيح ممكن يكون مهم علشان نقفل الصفحة دي وكلامي كله عليه شهود موجودين من زملاء ومن أقارب كمان من الدرجه الأولى".

وأضاف قائلًا: "في ٢٠٠٩ لما اشتغلنا أنا وتوما والملحن محمد يحيى وقدمنا أول ألبوم لأبو الليف من إنتاجنا إحنا ما استخسرناش أي حاجه معاه وعملنا ألبوم كسر الدنيا واللي حضراتكم ماتعرفهوش إننا لما تعاقدنا مع ا. جمال مروان شركة ميلودي في وقت عزها وعز قنواتها اتفقنا أنا ويحيى وتوما على إن المبلغ اللي هتدفعه ميلودي هنقسمه على أربعه ومافكرناش اننا أسماء ونادر صوت جديد وبعد ما نحسب مثلا التكلفة الفعلية الكبيرة للألبوم واعتقد الكواليتي كان واضح يعني إحنا كنا جدعان معاه واوي كمان وكنا كمنتجين بناخد نسبه احنا التلاتة ١٠ في الميه لكل واحد يعني لو أبو الليف طلع فرح كان بيطلع لي ٣٠٠ جنيه".

وأكد: "حصلت مشاكل وميلودي كانت بتقفل وحصل بينا وبينهم مشاكل وقضايا وكان أبو الليف هيتوقف لجأنا للمستشار مرتضى منصور، اللي وقف جنبنا وقتها بلا مقابل بسبب تعاطفة معانا وبسبب تاني إن أمير مرتضى كان عايز يخدمني ويستجدع معايا كعادته وبالفعل نجحنا اننا نتعاقد مع شركة نجوم ريكوردز ومضينا معاهم وتاني قسمنا مبلغ التعاقد على أربعه برغم أني كنت بطلع خسران كل ألبوم ومابكملش أجري كشاعر في الأغاني بس كان حماسي طاغي للتجربه".

وتابع: "نزل الألبوم وقت نجاح الإخوان وماعملش جو وابتدت البلد تدخل في ظروف صعبة وفي وقت الإعلان الدستوري لمرسي والبلد في مظاهرات وواقفه ابتدى نادر يضغط.. هو أنا ليه مش بنزل حفلات؟ فين الكليبات؟ فين الأفراح؟ مع إن الشعب كان قاعد عند الاتحاديه والتحرير وقتها، هو نجح في وقت صعب.. فضل يضغط وراح باعت رساله لكريم الحميدي اللي كان مسؤول وقتها في نجوم ريكوردز وكريم موجود وكانت رسالة مش لطيفة وطلب وقتها فسخ التعاقد معانا ومع نجوم ريكوردز وأنا وقتها اتصدمت.. إفسخ مع نجوم ريكوردز.. مع توما.. مع يحيى ..بس مش معايا أنا!! المهم عاملناه بمنتهى الاحترام والرقي أنا ويحيى وتوما وفسخنا بالحسنى وكالعاده نجوم ريكوردز محترمين ا. أيمن سالم ومدام هالة حجازي واتنازلوا عن الشرط الجزائي وخسرنا تعاقد محترم جدًا عمرنا ما هنعرف نعوض ربعه النهارده".

وأوضح: "كان فيه حسابات بينا قولنا في بيتها وحبيبنا وأخونا وادينا له كامل حريته، وبرغم أنه كان بيشتكي أيام الإعلان الدستوري إن نوعية الأغاني اللي بكتبهاله مش بتأكله عيش زائد اننا متفقين معاه مافيش شارع الهرم من البداية جه قال أنا عايز أغني شعبي صرف وده ماكانش اتفاقنا اتفاجئنا أول ما سابنا أنه راح عمل أغنيه اسمها كينج كونج ٢ مع اخويا الشاعر هشام صادق، وطبعا أنا مازعلتش لإن ده هشام ومعاه مني تصريح يعمل اللي هو عايزة احنا أخوات  بس استغربت بصراحة انت ليه يا نادر سبتنا عشان أغانينا مش بتنزلك لايف أيام الإعلان الدستوري، ورايح تعمل تاني نفس اللون!".

واختتم "قمر" قائلًا: "المهم لما مامشيتش الدنيا ابتدى يلمح بتقصيرنا معاه في اللقاءات وإلتزمنا الصمت.. سمعت كلام من عينة أن أنا مانع ظهوره في القنوات واستغربت أنه شايفني بالقوه والسطوه دي وكلام كتير بيوصلني بس مش ده المهم من سنتين لقيت الفنان أحمد فهمي بيرشحه لتتر مسلسل "الواد سيد الشحات"، رحبت جدًا وعادي والاغنيه نزلت، فأنا حقيقي مش فاهم لحد دلوقتي هو بيقول ليه كده وعايز ايه واحنا قصرنا في ايه، ربنا يوفقك يا نادر ويكتب لك الخير في حياتك ومن فضلك كفايه لحد كده.. واسف طولت جدًا".