بالفيديو والصور.. أحمد مكي أخيرًا على الـ" فيس بوك"
دشن النجم أحمد مكي صفحته الرسمية على موقع التواصل الإجتماعي "فيس بوك"، أمس الخميس، وكتب توضيحًا للسبب الذي دفعه لتغيير رأيه حيث أنه كان لا يملك صفحة رسمية أوحساب شخصي له على "الفيس بوك"، الأمر الذي دفعه لغناء "أنا ماليش أكونت عالفيس بوك اسمع من مكي." في أغنيته "فيسبوكي" التي أطلقها ردًا على الصفحات المزيفة التي تستغل اسمه.
كتب "مكي" يقول:" الّي خلاني اعمل الصفحة دي اني لقيت كم ناس سألت عليا لما غبت السنه الي فاتت و بيستفسروا انا اختفيت فين ، وكنت حابب اشكرهم على سؤالهم عليا لأنه فعلا فرق معايا نفسيا وكنت محتاجه قوي، انا كان بقالي سنه تقريبا عيان جداً ، كان عندي ( فيروس ) ضربلي الكبد و الطحال، مكنتش حتى اقدر اشرب بق ميه بسبب الطحال، وكنت في شبه كومه اول شهرين من المرض ، عشان الكبد كان عملي خمول ، كنت بأنام من 18 ل 20 ساعه في اليوم !!!">
وأضاف "أحمد": "خسيت فوق ال 30 كيلو و كنت شبه فاقد للأمل ، الحمد لله على كل حال ، انا دلوقتي خفيت تماما و وزني زاد تاني ، و اتعلمت كتير جدا في الرحلة دي ، وكان فارق معايا جدا سؤالكم عني ، حسّيت ان ليا أهل مش جمهور ، وإني فرقت معاهم لما غبت ، ربنا يفرح قلوبكم زي ما فرحتوا قلبي.">
واختتم على طريقته الكوميدية وقال:"واهلا بيكم في صفحتي، سكي ملواني = مكي !، هي دي السغه لمبه ، وفيه بعض الناس تحب تنطقها السغه لمون !، وهي لغه شارع كانوا بيتكلموها عشان الحكومه ماتفهمش هما بيقولوا ايه زي شفره، وطريقتها بإختصار، الكلمة اللي عاوز تقولها بتشيل اول حرف فيها وتحط مكانه حرف السين ( س )، و تقول بعد الكلمه دي اي كلمه تانيه بشرط يكون اول حرف فيها هو الي انت حذفته و غيرته ب ( س ) من الكلمه الي قبلها
مثال :
مكي
شيلنا اول حرف الي هو ( الميم ) و حطينا ( س ) فبقت ( سكي )
حطينا كلمه بعدها بدايتها حرف ( م ) الي شيلناها من مكي
حطينا كلمه ( ملواني )
و بكده ( سكي ملواني ) = ( مكي )
( سغه لمبه ) = ( لغه )
( سكرونه ممبار ) = ( مكرونه )
و هكذا
كما ظهر في فيديو من خلال صفحته الرسمية للإعلان عنها، يروي المعاناة التي مر بها عند اختياره لـ"اسم الصفحة"، فالصفحات المزيفة استخدمت جميع الأسماء، فاختار أن يكتبه بلغة "السغه لمبه".
