هيثم سعيد يكتب:" تأثير الفراشة".. ركز في الخير وشكرا
مفيش حاجه بتحصلك كإنسان وبتكون راضي عنها بشكل كامل...السيئ بتقول يا ريتني ماعملت كذا عشان ميحصلش كذا والكويس بتقول يا ريتني تعبت شويه زياده كان يبقي الخير اكتر..انت متصور انك لو كنت غيرت حاجه في اللي حصل ان النتيجة هتكون انك علي وضعك زي ما انت بس الشيء اللي كان مضايقك مش موجود..علميا ده مش صحيح زي مابتقول نظرية الفراشة ..اسمها غريب بس اتسمت كده لأن النظريه بتقول ان اي حدث بسيط مهما كانت بساطته عندما يحدث في مكان وزمان محددين ينعكس بشكل حدث في غاية الضخامه في زمان ومكان آخرين.. يعني مثلا لو رفرفة جناح فراشه النهارده في شرق قاره فضلت تتضاعف بسبب العوامل الجويه هتوصل غرب القاره بكره علي شكل موجة ريح قوية.. معني كده انك لو علي وضعك دلوقتي ورجعت بالزمن تغير حاجات حتى لو بسيطه زي سمير وشهير وبهير كده ممكن ترجع لزمنك متلاقيش وضعك اساسا هتلاقي وضع تاني غير قابل للمقارنه باللي كنت فيه وعاوز تغيره.. ممكن لأفضل ويمكن أسوأ ...عشان كده متشغلش نفسك بيا ريتني ولو.. اتعلم من الماضي ان التصرف البسيط مهما كانت بساطته هيسبب تغير كبير في شكل حياتك كمان كام سنه .. لو خير هيبقي خيرو لو شر ربنا يستر هيبقى شر...عشان كده ركز في الخير.. وشكرا.