هلا رشدي تكشف لـ"وشوشة" تفاصيل ألبومها الجديد
تستعد الفنانة هلا رشدي بتجهيز ألبومها الجديد بالتعاون مع المنتج مصطفى السويفي، والذي لا يشمل أغاني حب أو دراما بل يحمل رسائل إجتماعية بجانب عدد من الأغاني للأطفال.
كشفت هلا رشدي في تصريح خاص لـ "وشوشة"، عن ملامح مشروعها الغنائي الجديد، مؤكدة أنها قررت تاخد خط مختلف تمامًا في ألبومها القادم، إذ يجمع بين رسائل إجتماعية ويناقش موضوعات خاصة بالمرأة، وايضا يهتم بالعديد من قضايا الطفل من بينها "التنمر".
وقالت هلا رشدي: "أنا شغالة دلوقتي على ألبوم جديد مع المنتج مصطفى السويفي، خلصت منه 3 أغاني، ولسه ما اخترتش هبدأ بأنهي واحدة فيهم، لأن كل أغنية ليها حالة خاصة".
وأضافت: "الألبوم ده مش مقسوم ومش حزين، أنا زهقت من الدراما، عاوزة أقدم أغاني فيها مشاعر حلوة ورسائل إنسانية واجتماعية توصل للناس، أغاني تفرح وتطبطب".
وتابعت: "في نفس الوقت بجهز ألبوم تاني خالص للأطفال، بسمع كلام وألحان كتير، ونفسي أعمل حاجة تفضل في ذاكرة الولاد، زي ما احنا فاكرين أغاني طفولتنا".
وعن فكرة مسلسل الأنيميشن في رمضان، قالت: "نفسي جدًا أعمل مسلسل أنيميشن للأطفال في رمضان، يفهم دماغ الجيل ده، ويتكلم عن التنمر، وعن الطفل الطيب اللي بيتريقوا عليه عشان مؤدب، عاوزة أقوله: سيبوا الطيبين ما يتكسفوش من طيبتهم".
وأضافت: "عاوزة كمان أتكلم عن احترام الأب والأم، ماينفعش البنت تقول لمامتها يا هلا، أنا اسمي ماما، في حاجات تحت اسم التربية الحديثة بوظت مفاهيم كتير، والتربية النبوية كانت أحن وأجمل، زي معاملة سيدنا النبي لأنس بن مالك".
وفي رسالة خاصة وجهتها للفنانة الشابة جويرية حمدي بعد الهجوم عليها بالفترة الأخيرة، قالت هلا: "يا جويرية انتي قمر، ربنا يحفظك، كملي في سكتك، كلنا بنغلط ونتعلم، اسمعي النقد اللي يحسنك وسيبي الباقي، الكومنت السلبي صاحبه مشي وضحك وانتي اللي اكتئبتي، ماتخليش حاجة تكسرك".
وعن اعتزال حنان ترك، قالت: "أنا بحترم قرارها جدًا، وكل واحد ليه أولوياته، وماينفعش أقول لحد ارجع أو ماترجعش، زي الفنانة الهندية سانا خان اللي اعتزلت في عز نجوميتها، احنا محتاجين النماذج دي".
كما علقت هلا رشدي عما تشهده السعودية في الوقت الحالي قائلة: "ربنا يحفظ بلاد الحرمين وتفضل آمنة وبتلم العالم كله في حضنها، وووجهت كلمة للمصريين، معلقة: دول متعة، لو مش موجودين 3/4 اللذاذة هتختفي، ساعات بشوف كوميكس بستغرب جابوها إزاي".