محمد حسني لـ"وشوشة": أحمد فؤاد يمتلك رؤية فنية مميزة.. وأتمنى عودة المسرح بقوة للجمهور

كشف الفنان محمد حسني عن كواليس مشاركته في مسرحية "التياترو" في موسمها الثالث على مسرح السلام، وتحدث عن تجربة الشغل مع المخرج أحمد فؤاد، وعن إيهاب فهمي ومحسن منصور، وأعماله في رمضان.

وقال حسني في تصريح خاص لـ"وشوشة": "من الحاجات الحلوة اللي عملها أحمد فؤاد إنه عمل تركيبة حلوة، تجميعة ناس بينهم كيمياء كويسة، تجميعة فنانين موهوبين عندهم موهبة بجد".

وأضاف: "الشغل مع الناس اللي زي دي بيبقى سهل جدا، لأن انت بتشتغلي مع حد موهوب".

وعن إيهاب فهمي ومحسن منصور قال: "إخوات وأصدقاء وعيش وملح، أساتذة وفنانين كبار، وبيديروا منظومة هما الاتنين، إيهاب بيدير المسرح الفني، ومحسن بيدير المسرح الحديث".

وتابع: "الله يكون في عونهم، بيشتغلوا في ظروف صعبة جدا، وبيحاولوا يطلعوا شغل كويس عشان يسعدوا الناس".

وعن دعم الدولة للمسرح قال: "البيت الفني شغال، بس ممكن يبقى شغال أحسن من كده كتير، عندنا مسارح كتيرة ممكن تشتغل كويس، مش لازم تشتغل بسوبر ستار".

وأضاف: "لو بتقدم شباب أو وجوه جديدة ماشي إيه المشكلة؟ السوق دايما الدم الجديد يضخ له".

وعن تواجده مع الشباب قال: "كان ده الطبيعي زمان، فاكر وأنا في الجامعة حضرت عرض بطولة ستة، خمسة ما حدش يعرفهم، والسادس كان حسن حسني".

وعن التعاون مع أحمد فؤاد قال: "أول مرة أتعامل معاه، عنده رؤية ووجهة نظر، أنا طلبت أشتغل معاه لما شفت شغله، هو فنان قوي، ولما اتكلمنا في الدور حسيت إني قدام حد فاهم".

وعن رمضان قال: "في تلت حاجات، منهم حاجة كوميدي، منهم حاجة للمتحدة، إن شاء الله خير جدا".

قدم محمد حسني عدد من الأعمال الفنية وكانت بداياته  في مسلسلات "شباب أون لاين" و"تامر وشوقية" و"مبروك جالك قلق"، ومن ثمجاءت انطلاقته الكبرى من خلال مسلسل "الدالي" الذي قدم فيه دور ضابط أمن الدولة "عاصم"، وعرفه الجمهور من خلاله، ثم توالت أدواره في مسلسلات "ابن الأرندلي" و"سلسال الدم" مع عبلة كامل ورياض الخولي في أجزائه الثلاثة، فضلا عن قيامه بعدد من الأعمال السينمائية من بينها  "مقلب حرامية"، ثم قدم "تك تك بوم" و"قط وفار" و"يوم من الأيام" و"خلاويص"، كما شارك في مسلسلات "الخواجة عبد القادر" و"الكبير أوي" و"شطرنج" و"الزيبق" و"الجماعة".

وفي  المسرح شارك في "أهلا رمضان"، ويشارك حاليا في بطولة الموسم الثالث من مسرحية "التياترو" للمخرج أحمد فؤاد، وتأليف أحمد الملواني، على مسرح السلام.