صناع ألبوم مش هتكرر لـ"وشوشة": تامر حسني بيختار الأغنية اللي تلمسه

يحتفل اليوم الفنان تامر حسني بعيد ميلاده وسط احتفاء واسع من جمهوره ومحبيه، الذين يحرصون في كل عام على تهنئته واستعادة أبرز محطاته الفنية والأغاني التي قدمها على مدار مشواره، الذي نجح خلاله في تحقيق جماهيرية كبيرة داخل مصر والوطن العربي.

وبالتزامن مع عيد ميلاد تامر حسني تواصل وشوشة مع عدد من صناع وفريق عمل ألبومه مش هتكرر، للحديث عن تجربتهم معه، وطريقته في اختيار أغانيه، ومدى قدرته على معرفة العمل الذي يمكن أن يصل إلى الجمهور ويحقق نجاحًا واسعًا.

أحمد عبد السلام: تامر حسني بيختار الأغنية اللي تلمسه

وقال الموزع الموسيقي أحمد عبد السلام في تصريح خاص لـ"وشوشة":"طبعًا بهني حبيبي وصاحبي تامر حسني بعيد ميلاده، وعقبال 100 سنة".

وأضاف :"تامر بيختار الأغنية اللي تلمسه ويحسها، واللي بيطلع من القلب بيوصل للقلب".

وتابع أحمد عبد السلام:"وبالنسبة إنه يحدد هتنجح ولا لأ، هو أكيد محدش يعرف الأغنية هتنجح ولا لأ، بس هو بيبذل أقصى مجهود عنده إنها تطلع في أحسن شكل، وأحيانًا كتير بنجرب كذا شكل للأغنية عشان نبقى في الآخر مقتنعين إنها في أفضل شكل".

أحمد عادل: تامر بيسمع الأغنية من زاوية الجمهور

وقال الموزع الموسيقي أحمد عادل في تصريح خاص لـ"وشوشة":"أعتقد إن سر تامر حسني في اختيار أغانيه إنه مش بيسمع الأغنية كفنان بس، لكن كمان بيسمعها من زاوية الجمهور، وعنده إحساس قوي جدًا بالأغنية اللي ممكن تلمس الناس وتفضل معاهم".

وأضاف:"مفيش طبعًا معادلة مضمونة للنجاح، لكن تامر عنده إحساس عالي جدًا بالأغنية، وبيهتم بالتفاصيل لحد ما يحس إن كل العناصر في مكانها الصح".

واختتم حديثه قائلًا:"ومن خلال تعاوني معاه، أقدر أقول إن دي من أهم مميزاته. وكل سنة وتامر طيب، وعقبال سنين كتير من النجاح والتألق، وإن شاء الله دايمًا من نجاح لنجاح".

أحمد حسام: تامر عنده خبرة ووعي باختياراته

وقال الموزع الموسيقي أحمد حسام في تصريح خاص لـ"وشوشة":"والله تحديدًا مش عارف، لكن تامر فنان كبير وعنده من الخبرة والوعي إنه يقدر يحس الحاجات اللي ممكن تنجح وتعجب الناس وتوصل لقلبها".

وتأتي هذه التصريحات بالتزامن مع احتفال تامر حسني بعيد ميلاده، لتكشف جانبًا من طريقة تعامله مع الأغنية، بداية من اختيارها، مرورًا بتفاصيل تنفيذها، وصولًا إلى الصورة النهائية التي يطرحها للجمهور.