محمد أنور لـ"وشوشة": فيلم محمود التاني هيكون أعلى من الحريفة.. ونجاح الثنائية ذكاء من الإنتاج
تحدث الفنان محمد أنور في تصريح خاص لـ"وشوشة"، عن فيلم محمود التاني، بطولة الفنان أحمد غزي والفنان كزبرة، وذلك على هامش حضوره العرض الخاص للعمل، معربًا عن سعادته بتعاون الثنائي مجددًا بعد النجاح الذي حققاه في فيلم الحريفة.
وقال محمد أنور: "أنا بجد مبسوط جدًا، بحبهم جدًا جدًا من الحريفة، وشايف إن ذكاء من شركة الإنتاج إنها تشوف إن الناس دي نجحت مع بعض في حاجة، فتحاول تستثمر النجاح ده في حاجة تانية مختلفة، وده بجد ذكاء كبير جدًا، وإن شاء الله يارب بإذن الله ربنا يكرمهم، شايف نجاح كبير والله بجد".
محمد أنور: متوقع نجاح محمود التاني
وعن توقعاته للفيلم أكد محمد أنور أنه يتوقع أن يحقق العمل نجاحًا كبيرًا، خاصة أن الثنائي أصبح أكثر خبرة وانسجامًا بعد تجربتهما السابقة، موضحًا:"أنا متوقع إنها حلوة جدًا، لأن هما بالعكس بقوا يعني، هما كانوا أول مرة يشتغلوا في الحريفة وكانت الثنائية دي عظيمة، فتخيلي بقى إن هما بقوا متمرسين، فـ أظن إن محمود التاني بقى أعلى".
محمد أنور يتحدث عن بيت بابا
كما تحدث محمد أنور عن مسلسل بيت بابا، مؤكدًا أن نجاح الجزء الأول وضع فريق العمل أمام مسؤولية كبيرة لتقديم محتوى ينال إعجاب الجمهور، قائلًا:"والله الحمد لله عايز أقولك إن بيت بابا ده بيحملنا مسؤولية إن إحنا لازم نعمل حاجة الناس تعجبها، لازم يعني الناس تعجبها، وإن شاء الله يارب بإذن الله، فوالله اجتهدنا جدًا في الورق عشان الناس تشوف نفسها جوه المسلسل، بس ده المهم عندنا".
وأضاف محمد أنور أن استمرار المسلسل لأجزاء متعددة يعد دليلًا على نجاحه وتفاعل الجمهور معه، موضحًا:"آه طبعًا، عايز أقولك إن القناة لو حاجة عندهم مش ناجحة مش هيعملوا منها الأربع أجزاء، فالحمد لله رب العالمين، ده معناه إن أنت حققت نجاح والناس حست بيه، وده مهم".
وأشار محمد أنور إلى أن المسلسل ينتمي إلى نوعية الأعمال الاجتماعية التي تشبه مسلسلات الزمن الجميل، قائلًا:"إنت عامل مسلسل شبه مسلسلات زمان اللي الناس كانت بتحبها، اللي هو أسرة بسيطة فيها الدكتور وفيها المحامي وفيها المهندس، مشاكلهم بقى، ومشاكل المتجوزين، فإحنا بناقش كل الأعمار".
محمد أنور يكشف عن أعماله السينمائية
وعن أعماله السينمائية أوضح محمد أنور أنه قدم عددًا من الأفلام التي لم تُطرح للجمهور حتى الآن، قائلًا:"السينما عملت أفلام سينما ومنزلتش مش عارف ليه، يعني عملت فيلم بيج رامي بقاله أكتر من سنتين، عملت فيلم الشيطان شاطر بقاله أكتر من سنتين".
واختتم محمد أنور حديثه عن أعماله المقبلة قائلًا:"يعني قصدي عملت حاجات سينما، ممكن تلاقيني فجأة في السينما كتير، فجأة".
